Шығыс жастары ел тағдыры үшін маңызды қадамға үн қосты

15 наурызда өтетін республикалық референдум қарсаңында Шығыс жастары ел тағдыры үшін маңызды қадамға үн қосты. Олар үшін болашақ – алыс көкжиек емес, бүгінгі таңдаудан басталатын нақты жауапкершілік. Өйткені мемлекет ертеңі әр азаматтың саналы шешімі мен азаматтық ұстанымына байланысты айқындалады.

Жас буын өкілдерінің айтуынша, референдум – үнсіз қалатын сәт емес, керісінше өз көзқарасыңды ашық білдіріп, елдің даму бағытына үлес қосатын мүмкіндік.

«Тағдыр таразысы тек биік мінберлерде ғана шешілмейді. Барлығы сайлау учаскесіне келіп, өз таңдауын жасаған әр азаматтың қадамынан басталады», – дейді бастамашыл топ өкілдері.

Айдос Әділбекұлы атап өткендей, «жастардың белсенді азаматтық ұстанымы – елдің тұрақты дамуының берік негізі. Жас ұрпақ саналы таңдау жасағанда, олар тек өз болашағын ғана емес, тұтас мемлекеттің келешегін айқындайды».

Шығыс жастары бұл үндеуді міндеттеу ретінде емес, саналы азаматтың ел алдындағы парызы ретінде қабылдауға шақырады. Себебі азаматтық белсенділік – заңмен берілген құқықты пайдалану ғана емес, сол құқық арқылы қоғам дамуына ықпал ету.

«Болашақ – сырттай бақылаушылардың емес, әрекет ететін азаматтардың қолында» деген ұстаным бүгінгі буынның ортақ ұранына айналды. Сондықтан 15 наурыз – күнтізбедегі жай ғана дата емес, ел тағдырына бейжай қарамайтын жандардың таңдауы сыналатын күн.

Әр дауыс – жауапкершілік. Әр таңдау – тарихтың бір бөлшегі. Ал тарихты өз тағдырына немқұрайлы қарамайтын халық жасайды.