Шымкент әкімі Руслан Берденовке жасалған қастандық туралы алғаш рет пікір білдірді

Еске салсақ, оқиға сәуір айында әкімдік ғимаратының жанында болған. Сол кезде Берденовке оның қарамағындағы «Тұрғын үй Шымкент» ЖШС басшысы Ернар Жиенбай оқ атқан. Кейін ол адам өлтіруге оқталды деп танылып, тоғыз жылға сотталды, деп хабарлайды Arasha.kz.

Бүгін брифингте Ғабит Сыздықбеков Жиенбайдың өзіне жала жапқан мәлімдемелерін жоққа шығарды.

«Бұл оқиғаға менің қатысым бар деген әңгімелер — негізсіз. Қандай қатысым болуы мүмкін? Әрине, адам өзін қорғау үшін не болса да айтады. Болды. Сот шешім шығарды, мәселе жабық. Оны қайта-қайта көтерудің қажеті жоқ», — деді қала әкімі.

Сондай-ақ ол Берденовтің әкімдікте бар болғаны бір ай ғана жұмыс істегенін айтып, «оның келуімен қала гүлденді» деген пікірлер шындыққа жанаспайтынын жеткізді.

«Әртүрлі сөз көбейді. Мысалы, оның келуімен қала гүлдене бастады деген әңгіме бар. Бұл — шындыққа сай емес. Ол қызметіне енді ғана кірісіп жатқан. Бұдан кейін не болғанын өздеріңіз білесіздер. Әр адам өз пікіріне құқылы», — деді мегаполис басшысы.