Шымкент жасыл желекке айналып келеді

Табиғатты аялау мен қоршаған ортаны қорғау мәселесі бүгінде қала дамуының негізгі бағыттарының бірі саналады.

Биыл Шымкент қаласының Абай ауда­нында ерекше экологиялық жобаның құрылысы басталды. Бұрынғы ескі қоқыс по­лигонының орнына жаңа «Экопарк» саяба­ғы бой көтермек. Бұл нысан мегаполис тұр­ғын­дары үшін таза ауада тынығып, серуендеп, спортпен айналысуға арналған заманауи де­ма­лыс аймағына айналмақ. Бұл туралы Шым­кент қаласындағы өңірлік коммуникациялар қызметінде Шымкент қаласы әкімінің орын­басары, қала әкімдігінің ресми өкілі Сәрсен Құранбек журналистермен өткізген брифинг­те атап өтті. 

«Экопарк» тек саябақ емес, экологиялық мә­дениетті арттырудың, табиғатпен үйлесімді өмір сүру салтын қалыптастырудың жаңа үл­гісі болмақ. Мұнда табиғи ландшафт сақ­та­лып, жасыл белдеу кеңейтіледі. Құрылыс ба­ры­сында аумақты көгалдандыруға ерекше мән берілуде. Демеушілік қолдау аясында жергілікті және отандық кәсіпорындар бұл жо­баға белсенді атсалысуда. Жоба аясында «Да­ни нан» компаниясы саябақ аумағына 5 000 дана ағаш көшетін отырғызуды қолға алды. Оның ішінде рябина, дуб, катальпа, ясень, клен, черемуха, тополь және липа сияқ­ты ағаш түрлері бар. Әр ағаштың биіктігі 3–7 метр аралығында, яғни егісімен-ақ жасыл көрініс береді. Сонымен қатар BI GROUP ком­паниясы 9 су ұңғымасын қазып, 13 гектар жер­ге автоматты суғару жүйесін орнатуды жос­парлап отыр. Бұл жүйе жасыл желектің үз­дік­сіз күтімін қамтамасыз етіп, суды үнем­деп пайдалануға мүмкіндік береді. DALA FRUIT ЖШС-ы да экологиялық бастамаға қол­дау білдіріп, 1 800 дана жеміс ағашын және 1 215 м² аумаққа сәндік өсімдіктерді егуді қол­ға алды. Бұған қоса, 8 гектар жерге там­шы­латып суғару жүйесі жүргізілмек. Осындай бір­лескен еңбек қаланың экологиялық мә­дениетін көтеріп қана қоймай, табиғатты ая­лауға деген тұрғындардың жауапкершілігін де арттыра түседі.

Қалалық жайлы ортаны дамыту басқар­ма­сы тарапынан Шымкент көшелерін көгал­дан­дыру мен абаттандыру жүйелі түрде жүзеге асы­рылып келеді. 2025 жылы ұзындығы 54,2 ша­қырымды құрайтын 27 магистралды кө­шеде (жалпы көлемі 500 мың м²) газондар мен суғару жүйесін жаңарту жұмыстары атқа­рыл­ды. Көгалдандыру аумақтарын сумен қам­тамасыз ету мақсатында басты көшелерде 32 су ұңғымасы іске қосылды. Көктемгі ағаш егу маусымында жаңадан салынған шағын аудандардың негізгі көшелеріне 3 000 дана ағаш көшеті (гуджум, шынар, қызғалдақ аға­шы) отырғызылды. Ал күзгі маусымда биіктігі 2,5–7 метр болатын тағы 2 600 көшет егілмек. Қаланың көркін ашып, тұрғындарға эстети­калық ләззат сыйлау мақсатында мемлекеттік-жекешелік әріптестік аясында 22 000-нан астам көпжылдық гүл түрлері (лаванда, мож­жевельник, анабель, спирея, раушан) егілуде. Бұдан бөлек, демеушілердің қолдауымен жал­пы аумағы 1 гектар болатын жылыжай жал­ға алынып, онда гүл көшеттерін өсіру жұ­мыстары басталды. Бұл бастама 2026 жылы қала көшелеріне 1,6 миллионнан астам гүл отыр­ғызуға мүмкіндік береді. Осылайша, Шым­кенттің әр бұрышы гүлге оранып, тұр­ғын­­дарға ерекше көңіл күй сыйлайтын бо­лады.

Ауқымды экологиялық жобалар Шымкент қаласының экожүйесін жақсартуға, табиғи ре­сурстарды тиімді пайдалануға және тұрғын­дардың өмір сапасын арттыруға бағытталған. Сонымен қатар мұндай бастамалар бюджет қаражатын үнемдеуге және экологиялық тұ­рақ­тылықты қамтамасыз етуге зор мүмкіндік береді. Қала әкімдігі мен кәсіпкерлердің өзара серіктестігі нәтижесінде Шымкент бүгінде елі­міздегі ең жасыл мегаполистің біріне айна­лып келеді. Бүгінде Шымкент тек өндіріс пен сауда орталығы емес, экологиялық мәдениеті жоғары, табиғатпен үйлескен қала болуға нық қадам жасап отыр. «Экопарк» саябағы мен жаңа жасыл белдеулер – осы бағыттағы үлкен жетістіктің бастауы. Табиғатты аялау – бола­шаққа қамқорлық. Ал Шымкент қаласының бұл бағыттағы жүйелі жұмысы – елдің өзге өңірлеріне үлгі боларлық тәжірибе.

Назгүл НАЗАРБЕК,

Шымкент қаласы