Шымкентте айналма жол жаңғыртылып жатыр

Шымкентте транзиттік маңызы жоғары А-2 айналма жолын жаңғырту жұмыстары қарқын алған. Ірі жобаға бюжеттен 30 млрд теңге жұмсалып, құрылыс алты жылдан бері тоқтаусыз жүрді. Биыл күрежолдың бірнеше учаскесі қолданысқа беріледі. Қалғанын келесі жылы аяқтау жоспарланған. 

А-2 айналма жолы — транзиттік дәліз. Көршілес Өзбекстан бағытына қарай шығатын автожолмен қосылады. Трассамен тәулігіне 40 мыңға жуық көлік қатынайды. Жолды кеңейту мен жаңғырту жобасы сегіз кезеңге жоспарланып, құрылыстың басым бөлігі аяқталды. Жер бедері тегістеліп, жаңа жол жабындысы төселді.

Нұрбол Ілесов, қалалық Жолаушылар көлігі және автомобиль жолдары басқармасының бөлім басшысы:

- Қазіргі таңда 1-2-3-4 кезеңдердің құрылысы толық аяқталып, пайдалануға берілген. Ағымдағы жылы 6-7-8 кезеңдерді пайдалануға береміз. Тиісті жерлерді төмен түсірдік немесе қажеттілігіне қарай жолдың деңгейін көтеретін тұстары болды. Соған сәйкес жолдың еңістігін сақтап, құрылыс нормаларына сәйкес көріну қабілетін қамтамасыз еттік.

Жалпы ұзындығы 30 шақырым болатын жолды жаңғыртуға 2016 жобалық-сметалық құжат жасалды. Жобаға сәйкес ескі екі жолақ 35 метрге дейін кеңейтіліп, көлік қозғалысын үш есе арттыру көзделген. Алайда құрылыс барысында кедергілер болды. 

Нұрсұлтан Мұхамеджан, тілші:

- Құрылыс жобасының ең күрделі кезеңі - Республика көшесінен Бадам өзеніне дейінгі аралық. Себебі мұнда 80 жер телімі мемлекет қажеттілігіне қайтарылуы керек. Зерделеу жұмыстарынан кейін учаскеде тұрғын үйлермен қосалқы шаруашылық нысандардың салынғаны анықталды.

Сала мамандарының мәліметінше, учаскелерді нарықтық бағалау аяқталды. Әзірге 23 жер телімі үшін өтемақы төленіп, нысандарды кезең-кезіңімен бұзу жоспарланды. Ал қалған меншік иелеріне зерделеу актісі таныстырылып, материалдар комиссия қарауына ұсынылды. 

Сәрсен Құранбек, қала әкімінің орынбасары:

- Сондай-ақ тексеріс барысында заңсыз салынған құрылыс нысандары да анықталды. Яғни тәртіп бойынша тіркеу жасатылмаған. Мұндай жылжымайтын мүліктерге қатысты шешім жер және қала құрылысы заңнамасына сәйкес қабылданады.

Ірі жобаның құрылысын келесі жылы аяқтау жоспарланған. «Жүзеге асса  халықаралық жүк тасымалы ұлғайып, транзиттік әлеует жақсарады», - дейді мамандар.

Авторлары: Нұрсұлтан Мұхамеджан, Нұрмахан Бекмұратов, Нұрмахан Мұсатов