Шымкентте ескі үй иелеріне жаңа баспана берілді

Шымкентте Тәуелсіздік күніне орай 20 отбасыға жаңа пәтер кілті табысталды.

Игі іс реновация бағдарламасы аясында жүзеге асты. Осылайша Көксайда орналасқан апатты үйлердің иесі Шымкент-сити және Тұран шағын аудандарына көшіріледі. 

Көксай шағын ауданында тозығы жеткен үйлердің иесіне жаңа пәтер кілттері табысталды. Бұл жолы реновация бағдарламасы бойынша 20 отбасы қамтылды. Қала әкімі Ғабит Сыздықбеков қуаныш иелерін құттықтады.

Ғабит Сыздықбеков, қала әкімі:

-Үйлеріңіз берекелі болсын. Той болсын үйлеріңізде. Бұл жұмыс тоқтамайды. Көріп жатырсыздар ғой. Шетінен үлестіріп жатырмыз. Инвесторлар табылғаннан кейін сіздерге де уақыты келеді. Мейрамға қарсы үйлі болып жатқандар үшін қуаныштымыз.

Үйі апатты деп танылған Замира Кенжекова жаңа баспанасына көшуге асық. Көпбалалы жанның күпті көңілі жадырап, басты уайымы сейілді. Көпшілікті қоныс тойға шақырды.

Замира Кенжекова, қала тұрғыны:

- Кірген кезде бөлмеміздің астыңғы этажына қарай селкілдеп тұрады. Балалар үшін қорқатынбыз. Жаңа үй беріп жатқанына өте қуаныштымыз. Көптен күткен жақсы жаңалығымыз бүгінге тура келіп тұр.

Биыл реновация бағдарлама аясында 103 отбасы Шымкент-сити және Тұран шағын аудандарына қоныс аударды. Олар заманауи, жайлы әрі кең баспанаға ие болды. Ал Көксайдағы қалған ескі үйлердің иесі осындай мүмкіндікке кезең-кезеңімен қол жеткізеді.  

Данияр Ахметжанов, "SHYMKENT" ӘКК" АҚ Басқарма төрағасы:

- Біз Көксайдағы 2 этаж үйлерді 50% көшіріп болдық. 12 үйіміз бар. Мысал үшін кейбір пәтерлердің наследствосы бітпеген. Кейбір пәтер залогта тұрғаны бар. Құжаттардың бәрін бітірген соң бізге келіп жатыр. Біз келгендерге қарастырып жатырмыз. 

Көксай шағын ауданын жаңғырту тұжырымдамасы аясында апатты үйлерді жою жоспарланған. Олардың орнына әлеуметтік нысандар салынып, аудан орталығы құрылмақ.

Нұрсұлтан Мұхамеджан, Нұрмахан Мұсатов