Шымкентте жасанды интеллект мектебі ашылды: Кімдер тегін оқи алады?

Egemen.KZ парақшасынан алынған деректерге сүйене отырып, Qazaq24.com жаңалық жариялайды..

Шымкентте ЖИ мектебі іске қосылды. Жобаға 18 жастан асқан кез келген азамат тегін қатыса алады. IT саласында тәжірибесі жоқ адамдарға да мүмкіндік берілген. Қазір алғашқы қатысушылар бағдарламалау мен цифрлық жобалар жасауды меңгеріп жатыр, деп хабарлайды Egemen.kz

Фото: 24.kz

24.kz-тің мәліметінше, Шымкент қаласында ашылған мектеп дәстүрлі оқыту жүйесінен өзгеше форматта жұмыс істейді. Мұнда дәріс пен конспектінің орнына командалық жұмыс пен нақты жобаларға басымдық беріледі. Оқушылар теорияны жаттап қана қоймай, бірден цифрлық өнім әзірлеуге машықтанады.

Мектептің өңірлік директоры Уәлихан Сламбеков бұл жүйенің халықаралық деңгейде тиімділігін дәлелдегенін айтты.

«01EDU жүйесі өзін әлемде дәлелдеді. Ол Қазақстанда ғана емес, Франция, Кения секілді елдерде де қолданылады. Бұл – дәстүрлі формат емес. Мұнда мұғалім, лекция, конспект болмайды. Оқу толықтай тегін», деді ол.

Мектепке қабылдану үшін үміткерлер арнайы компьютерлік ойыннан өтеді. Осы арқылы олардың есте сақтау қабілеті, логикасы және сыни ойлау деңгейі тексеріледі. Іріктеуден өткендер кәсіби әзірлеушілермен бірге жобалар жасап, екі жыл ішінде кемінде 50 жоба әзірлеуі тиіс.

ЖИ дәуіріндегі мектеп: Оқушыларға пайдасы мен қаупі қандай?

Сонымен қатар қалада жасанды интеллект зертханалары, робототехника бағыттары мен IT-стартаптар да қарқынды дамып келеді.

Tashenev University проректоры Жанар Рысбекова жасанды интеллектіні заман талабы деп бағалады.

«Бұл – бүгінгі күннің шындығы. Қазірдің өзінде жастар жаңа жүйелер мен бағдарламалар ойлап тауып жатыр. Біз бұдан қашып құтыла алмаймыз. Керісінше, жасанды интеллектіні көмекші құрал ретінде қабылдауымыз керек», деді ол.

Оқушылар дрон құрастырып, оларды басқаруды және роботтарды бағдарламалауды үйренеді. Тіпті кей зертханаларда ұшқышсыз аппараттар мини-футбол ойнайды.

Shymkent Hub алаңында да жасанды интеллект негізіндегі жобалар жүзеге асырылып жатыр. Қазір онда ондаған IT-стартап жұмыс істейді. Олардың кейбірі қаладағы инфрақұрылым мәселелерін шешуге бағытталған.

Shymkent Hub өңірлік менеджері Құрманғазы Мұратов айтуынша, қазір құбырларды сканерлейтін жоба бар. Ол құбырдың қай бөлігі ескіргенін анықтап, қай жерін ауыстыру қажет екенін көрсетеді. Бұған дейін құбыр толық кесіліп, түгел жаңартылатын.

Қазақстанда биыл ашылатын ЖИ университетіне кімдер түсе алады?

Ал Химия-технологиялық ғылымдар ғылыми-зерттеу институты директоры Жамбыл Айменов Шымкентте ірі жасанды интеллект және робототехника орталығы ашылатынын мәлімдеді.

«Техногендік қалдықтар негізінде құрылыс материалдарын өндірудің барлық технологиялық процесі роботтар мен робототехника көмегімен, адам қатысуын барынша азайта отырып жүзеге асырылады. Бұл бағытта біз қаламыздағы бірқатар озық кәсіпорындармен жұмыс істеп жатырмыз. Жобаға Қытай, Венгрия және бірнеше Еуропа елдерінің кәсіпорындары қатысады», деді Жамбыл Айменов.

Бүгінде жасанды интеллект білім беру, қала қызметтері мен өндіріс саласына белсенді енгізіліп жатыр. Шымкентте бұл бағыттағы мектептер мен зертханалар көбейіп, жаңа технологиялық стартаптар іске қосылып отыр.

Осыдан бірер жыл бұрын Қазақстанда алғашқы жасанды интеллект мектебі ашылатыны туралы хабарлағанбыз.

Соңғы жаңалықтар