Шымкенттегі мектепте баламалы энергия көзін пайдаланады

Шымкенттегі мектепте күн электр стансасы сынақтан сәтті өтті. Пилоттық жоба аясында күн панельдерінен едәуір қуат жиналып, коммуналдық шығын азайды.

Енді бұл тәжірибе өзге мектептерге де енгізілуі мүмкін. Ал оқушылар озық технологияларға қарып, түрлі ғылыми жоба ұсынып жатыр. 

№65 мектеп-гимназиясындағы күн электр стансасы сәтті сыналды. Шатырға орнатылған 92 панельден сағатына 50 киловатт энергия өндіріліп, электрге жұмсалатын шығынды 20%-ке дейін азайтуға мүмкіндік берді. Енді баламалы қуат көзі арқылы үнемделген қаражат білім ұясының материалдық-техникалық базасын жаңғыртуға жұмсалады.

Алмас Қайыпов, Ы.Алтынсарин атындағы №65 мектеп-гимназиясының директоры:

- 23 мың киловатт электр энергиясын бізге өндіріп берді. Бұл деген сөз жеті жарым айға шаққан кезде біздің жарыққа қойылған қаржының 1млн 700 мың теңгедей болжамды түрде қаражатты үнемдеуге көмектесті деп айта аламын.

Пилоттық жоба экономикалық тиімділігін көрсетті. Енді күн панелін көбейту жоспарланып, баламалы энергия көзін өзге мектептерге де енгізу ұсынылып отыр.

Күн панелі станциясы «ақылды жүйемен» жабдықталған. Есептеуіш құрылғылар қашықтан басқарылады. Бұл электр энергиясының тұрақты өндірісін қамтамасыз етіп, жүйенің қауіпсіздігін қадағалауға мүмкіндік береді.

Күн панельдері оқушылардың ғылыми ізденістеріне жол ашып, теориялық білімді тәжірибемен ұштастыруға мүмкіндік берді. Мәселен, Бисұлтан Бекқұлов электр стансасын жасанды интеллект арқылы жетілдіруді ұсынды. Оның «смарт-баннер» атты стансасы күн сәулесіне қарай өздігінен бейімделеді.

Бисұлтан Бекқұлов, Шымкент-Абай НЗМ 12-сынып оқушысы:

- Жасанды интеллект күннің қай жақтан түсіп жатқанын есептеп, баннерді күн бағытына қарай автоматты түрде бұрып отырады. Яғни бұл бізге күн сәулесін толық қабылдауға мүмкіндік береді.

Бұл жобалар бала бойында «электр энергиясын үнемдеу» мәдениетін қалыптастыруға ықпал етті. Өңірде 700-ден астам оқушы табиғи ресурстарды тиімді пайдалану мақсатында зерттеумен айналысады.

Ақмарал Нәжмедин, «Экология, өлкетану және туризм» орталығы директорының орынбасары:

- Біздің орталықта білім алушылар «энергия қуатын үнемдеу», «қалдық заттарды сұрыптау», және «көгалдандыру жұмыстары» бойынша зерттеу жұмыстарымен айналысады. Үздіктерді қалалық деңгейлік, республикалық деңгейлі конкурстарға қатыстырып отырамыз.

Мектеп оқушылары арасында экологиялық мәдениетті дамыту үшін «Жасыл клуб» жасақталған. Былтыр олардың ғылыми ізденістері мен зерттеу жұмыстары ұлттық байқауда жүлделі үшінші орынға ие болды.

Авторлары: Нұрсұлтан Мұхамеджан, Нұрмахан Бекмұратов, Нұрмахан Мұсатов