Шымкенттегі Нұрайдың өлімі мен қыз алып қашу: Тоқаев ІІМ ге полиция жұмысына баға беруді тапсырды

Президент Қасым-Жомарт Тоқаев Ұлттық құрылтайда елдің оңтүстігінде орын алған шулы қылмыстарға қатысты пікір білдірді, деп хабарлайды Arasha.kz.

«21 жастағы студент Нұрайдың қазасы бүкіл елді дүр сілкіндірді. Бұл іс бойынша Ұлттық құрылтайға 130-дан астам өтініш түсті. Мен Ішкі істер министрлігіне Шымкент полициясының іс-әрекетіне құқықтық баға беруді тапсырдым. Бас прокурор да бұл жағдайды мұқият тексереді», — деді Тоқаев.

Сондай-ақ, Мемлекет басшысы жасөспірімнің ұрлануына қатысты да пікір білдірді. Президент «алып қашу» мен зорлық-зомбылықты қатыгез қылмыс деп атады. Ол неке институтын еркек пен әйелдің ерікті одағы ретінде заңнамалық тұрғыда нығайту қажет деп есептейді.

Бұған қоса, Президент ұлттық құндылықтарға нұқсан келтіріп, жастарға жалған идеялар мен жаңашыл моральдық модельдер арқылы әсер еткісі келетін «саяси авантюристердің» қаупі туралы ескертті.

Еске сала кетейік, Нұрай Серікбайды 11 қаңтарда өлтірген болатын. Туыстарының айтуынша, оны тұрмысқа шығудан бас тартқан жігіті ізіне түсіп, мазалап жүрген.

Жақында тағы бір жантүршігерлік оқиға белгілі болды. 17 жастағы бойжеткенді ұрлап әкетіп, телефонын тартып алып, некеге «өз еркімен» келіскені туралы қолхат жазуға мәжбүрлеген. Жәбірленуші зорлық-зомбылық көргенін айтса, күдікті мен оның туыстары бұл әрекеттерін «салт-дәстүрмен» ақтауға тырысқан.