СІМ шетелге шығуды жоспарлаған қазақстандықтарға үндеу жасады

Қазақстан Сыртқы істер министрлігінің ресми өкілі Жанболат Үсенов шетелге шығуды жоспарлап отырған қазақстандықтарға үндеу жасады, - деп хабарлайды Tengri Travel.

Үндеуде не айтылды?

Ресми өкілдің айтуынша, қазақстандықтар жергілікті ережелерді білмегендіктен немесе сақтамағандықтан шетелде жиі қиын жағдайларға тап болады.

Атап айтқанда, сөз елде болу мерзімдерін бұзу, тыйым салынған немесе декларацияланбаған тауарларды өткізуге тырысу, сондай-ақ транзит ережелерін бұзу туралы болып отыр.

"Осыған байланысты отандастарымызды шетелге шығар алдында баратын елінің, сондай-ақ транзиттік мемлекеттердің заңнамасын, визалық және көші-қон талаптарын мұқият зерделеуге шақырамыз", – деді Үсенов.

Сондай-ақ СІМ төлқұжат, виза, тұруға рұқсат және басқа да құжаттардың қолданылу мерзімін алдын ала тексеруді ұсынады. Сонымен қатар, азаматтарға медициналық сақтандыруды рәсімдеуге, әуебилеттерді тек ресми сервистер арқылы сатып алуға және әуекомпаниялардың багаж бен транзитке қоятын талаптарын сақтауға кеңес беріледі.

Ведомство құжаттарды үшінші тұлғаларға бермеуге, сондай-ақ ішінде не бары белгісіз болса, өзге біреулердің сөмкесін, сәлемдемелерін және басқа да заттарын тасымалдамауға шақырды.

Үсенов шетелге емделуге, оқуға немесе жұмыс істеуге баратындарға ерекше назар аударды. Мұндай азаматтарға құжаттар, шақырулар, еңбек шарттары мен рұқсаттардың рәсімделу заңдылығын алдын ала тексеру ұсынылады.

"Жаппай сапарларды ұйымдастырушылармен келісімдерді тексеру, сондай-ақ төтенше жағдайларға арналған іс-қимылдарды жоспарлау өте маңызды", – деді СІМ ресми өкілі.

Бұған дейін АҚШ көші-қон қызметі заңды көші-қон мәртебесі болмағандықтан қазақстандық әйелді ұстағаны туралы жаздық. Ол елде ұзақ уақыт бойы заңсыз жүрген.

Бізді Google-дың негізгі дереккөздер тізіміне қосыңыз