Ішкі істер министрлігі қазақстандықтарға үндеу жасады

АСТАНА, 27 мамыр – Sputnik. Ішкі істер министрлігі ел азаматтарын жазғы демалыс кезінде балалардың қауіпсіздігін қамтамасыз етуге шақырды, деп хабарлайды Polisia.kz.

ІІМ әкімшілік полиция комитетінің төрағасы Мұрат Қабденовтың мәліметінше осы уақытта балалардың қараусыз қалуы, заң бұзуы, жол апатына түсуі, суға бату немесе үйдегі түрлі қайғылы жағдайларға тап болу қаупі артады.

"Ең алдымен бұл жерде ата-аналардың рөлі ерекше. Балалардың қайда және кіммен жүргенін, күндіз немен айналысатынын, қызығушылықтары мен араласатын ортасы қандай екенін білу қажет. Сонымен қатар ата-аналардан цифрлық қауіпсіздік мәселесіне ерекше назар аударуды сұраймыз. Бүгінде балалар уақыттарының көп бөлігін интернетте өткізеді. Сондықтан баланың қандай сайттарға кіретінін, әлеуметтік желілерде кіммен сөйлесетінін, буллингке, психологиялық қысымға немесе зиянды контентке тап болмауын бақылау қажет", - деді Қабденов.

Ол ата-аналарға балаларды тәрбиелеу мен олардың қауіпсіздігі үшін жауапкершілік жүктелетінін еске салды.

"Ұстаздарды да демалыс кезінде отбасылармен байланыста болуға, қиын жағдайдағы балаларға назар аударуға және дер кезінде ден қоюға шақырамыз. Қоғамның қатысуы да маңызды. Егер сіз қауіпті жағдайда жүрген баланы, кешкі уақытта ересектердің қарауынсыз жүрген жасөспірімді, су айдындарының жанында, жол бойында немесе қауіп төндіретін ортада жүрген баланы көрсеңіз, бейжай қарамаңыз. Бір ескерту, бір қоңырау немесе дер кезінде жасалған әрекет баланың денсаулығы мен өмірін сақтап қалуы мүмкін", - дейді комитет төрағасы.

Оның айтуынша кәмелетке толмағандарға алкогольдік ішімдік пен темекі сату, ересектердің қарауынсыз түнгі уақытта ойын-сауық орындарында және үйден тыс жерлерде жүру деректері қатаң түрде тоқтатылады.

"Бүгінде балалардың қауіпсіздігі – отбасының, мектептің, мемлекеттің және бүкіл қоғамның ортақ жауапкершілігі", - деп түйіндеді Мұрат Қабденов.