Ішкі істер министрлігі азаматтарға референдум алдында үндеу жасады

АСТАНА, 13 наурыз – Sputnik. Ішкі істер министрлігі цифрлық технологиялар, нейрондық желілер мен жасанды интеллект дамыған сайын жалған контентті жасау және тарату айтарлықтай оңайлағанын мәлімдеді.

Референдум алдында министрлік республика азаматтарына үндеу жасап, интернет пен әлеуметтік желіде таралатын жалған ақпаратқа сақ болуды ескертті.

"Бүгінде цифрлық технологиялар мен жасанды интеллектінің дамуына байланысты жалған контент жасау бұрынғыдан әлдеқайда жеңілдеді. Қысқа уақытта шындыққа ұқсас, бірақ адамдарды жаңылыстыратын жалған материалдар таралуы мүмкін", – дейді ІІМ ресми өкілі Шыңғыс Алекешев.

Ол көрінеу жалған ақпарат тарату заң бұзушылық екенін, мұндай әрекеттер үшін әкімшілік те, қылмыстық та жауапкершілік қарастырылғанын ескертті.

"Күмәнді хабарламаларды көрсеңіздер – оны әрі қарай жібермеңіздер. Жалған ақпарат көбіне дәл осылай таралады. Ішкі істер министрлігі референдум кезінде қоғамдық тәртіп пен қауіпсіздікті толық қамтамасыз етеді. Жалған ақпарат таратқандар және арандатушылық әрекеттер жедел анықталып, заң аясында қатаң қаралады", - дейді ресми өкіл.