Соғыс қашан аяқталады? Трамп басты сауалға жауап берді

АҚШ президенті Дональд Трамп Флоридада үлкен баспасөз мәслихатын өткізіп, онда Владимир Путинмен болған әңгімесінің егжей-тегжейін ашып, әскери іс-қимылдардың аяқталуына қатысты болжам жасады, деп хабарлайды BBC.

Трамп ресейлік әріптесімен телефон арқылы келіссөз жүргізгенін растады. Оның айтуынша, әңгіменің басым бөлігі Украинадағы жағдайға арналған.

«Біз Украина туралы сөйлестік, бұл — ешқашан бітпейтін күрес сияқты. Президент Путин мен президент Зеленскийдің арасында үлкен өшпенділік бар, олар бір-бірімен тіл табыса алмайтын секілді. Бірақ, меніңше, бұл мәселе бойынша әңгіме жақсы өтті», — деді Америка лидері.

Трамп, сондай-ақ, Путиннің Иран қақтығысына көмектесу туралы ұсынысын қабылдамай, оны Украинадағы оқ атуды тоқтатуға назар аударуға шақырғанын айтты.

Журналистердің Ирандағы қақтығыстың аяқталу мерзімі туралы сауалына жауап бере отырып, Трамп бұл осы апта ішінде  емес, бірақ «жақын арада» аяқталатынын атап өтті. Ол қарсыластың «бәрінен», соның ішінде басшылығынан айырылғанын баса айтты.

Өз кезегінде, Ислам революциясының сақшылар корпусы (ИРСК) Трамптың мәлімдемелеріне шұғыл жауап қайтарып, Тегеран соғыстың аяқталу уақытын өзі анықтайтынын мәлімдеді.

Таяу Шығыстағы шиеленістің ушығуы аясында әлемдік нарықтар бағаның күрт өсуімен жауап берді. Мұнай баррелінің құны 2022 жылдан бері алғаш рет 100 долларлық межеден асты. Инвесторлардың қаупін ирандық әскерилердің мәлімдемесі күшейтті: ИРСК Израиль мен АҚШ Иранды бомбалауды тоқтатқанша, Ормуз бұғазы арқылы аймақтан мұнай экспортын бұғаттауға уәде берді.

Бүгін, 10:34