Соғысып жатқан елдерге Евровидениені өткізуге тыйым салынды

Eurovision ұйымдастырушылары ережеге қауіпсіздігіне "қарулы қақтығыс немесе күрделі геосаяси жағдай" "айтарлықтай әсер ететін" елдер ән байқауын өткізе алмайтыны туралы тармақ енгізді, деп хабарлайды Tengri Life DW басылымына сілтеме жасап.

Eurovision ұйымдастырушысы - Еуропалық хабар тарату одағы (EBU) сәрсенбіде, 12 тамызда халықаралық телевизиялық ән байқауының ережелері өзгергенін хабарлады. Енді өкілі "Евровидениеде" жеңіске жеткен елдің немесе "тікелей іргелес аймақтың" қауіпсіздігіне "қарулы қақтығыс немесе күрделі геосаяси жағдай" "айтарлықтай әсер етсе", ол ел келесі жылы байқауды өткізу құқығынан автоматты түрде айырылады.

"Қажет болған жағдайда EBU жеңімпаз ел орналасқан аймақтағы қауіпсіздік деңгейіне тәуелсіз бағалау жүргізе алады. Осы бағалау нәтижелері бойынша EBU "Евровидениенің" атқарушы комитеті болып табылатын Референттік топпен бірлесе отырып, жеңімпаз елдің хабар таратушы компаниясы байқаудың қауіпсіз өтуін қамтамасыз ете алатын-алмайтынын анықтайды. Егер жеңімпаз елдің компаниясы байқауды қабылдай алмайды деп танылса, EBU баламалы ұйымдастырушы-телеарнаны белгілейді", - деп жазылған ереженің жаңа редакциясында.

2022 жылы "Евровидениені" Украина жеңіп алды, бірақ елдегі соғысқа байланысты келесі жылы байқауды Ұлыбритания қабылдады. Осылайша, жаңа ереже ресми түрде бекітілмесе де, іс жүзінде қолданыла бастаған болатын. 2026 жылы Таяу Шығыстағы қақтығыстың ушығуы жағдайында Израиль өкілі "Евровидениеде" екінші орын алды.

Сондай-ақ EBU негізгі вокалист (немесе вокалистер) жанды дауыста айтуы тиіс деген ережені нақтылады.

"Фонограммалар мен алдын ала жазылған элементтерді ережеге сәйкес пайдалануға рұқсат етіледі, алайда негізгі вокал басты әуенді орындайтын жалғыз элемент болып қалуы тиіс; бұл элементтер жанды дауыстағы орындауды алмастыра алмайды немесе оған шамадан тыс демеу болмауы керек", - делінген "Евровидениенің" жаңа ережелерінде.

Бұдан бөлек, енді барлық әртістер алғашқы дайындық күніне дейін 18 жасқа толуы тиіс (бұрын бұл меже 16 жас болатын).

"Бұл жаңашылдық байқау ұйымдастырушыларының қауіпсіздік шараларын күшейту және жас әртістерді "Евровидениеге" қатысу кезіндегі психологиялық қысымнан қорғау бағытында бастаған жұмысының жалғасы", - деп атап өтті ұйымдастырушылар.

Жаңа ережелер 2027 жылы байқауды Болгария қабылдаған кезде күшіне енеді.

Мамыр айында бұл елге "Евровидениедегі" тарихи жеңісті "Bangaranga" композициясымен әнші Dara сыйлаған болатын.

Google News арқылы жаңалықтарымызды қадағалаңыз