Солтүстік Қазақстан жолдарында қанша қауіпті учаске бар

«ҚазАвтоЖол» ұлттық компаниясы облыстық филиалының мәліметінше, жұмыс Бағанаты елді мекені маңында жүргізіліп жатыр.

Жоспар бойынша 7,4 км қар ұстайтын қоршау орнатылуы тиіс, оның 6 км орнатылды.

— Қар ұстайтын учаскелерді азайту мақсатында тиісті жұмыс атқарылып жатыр. Қараша айының ортасына дейін аяқталады. Темірбетон қоршаулар қойылып жатыр. Осы мақсатқа 526 млн теңге бөлінген. Жалпы республикалық маңызы бар жолдарда қыста қауіпті жалпы ұзындығы 58 км болатын 31 учаске бар. Бұл жолдардың 6,1 шақырымында — ағаш, 8 шақырымында — темірбетон қар ұстайтын қоршау бар, — дейді филиал директорының орынбасары Қанат Өсербаев.

СҚО-да республикалық маңызы бар жолдардың жалпы ұзындығы — 2 мың км шамасында. Автожолдарды күтіп ұстаумен «ҚАЖсервис» ЖШС айналысады.

Оның құрамында 6 жол-пайдалану басқармасы және 11 жол-пайдалану пункті жұмыс істейді, 300-ге жуық жұмысшы бар.

— Қыс маусымына дайындық аясында бірқатар жұмыс атқарылды: шұңқырлар тегістелді, бұталар шабылды, жол жиегі орылады. Сонымен қатар қысқы маусымда қолданылатын 300-ге жуық уақытша жол белгілері, мысалы, «Тайғақ жол», «Жылдамдықты шектеу» және т. б. дайындалды. Қысқы кезеңде жолдарды күтіп ұстау үшін барлығы 152 техника дайындалған. Сонымен қатар, 26 техника жалға алынды. Былтыр техникалық парк жаңартылып, 47 жаңа техника сатып алынды. Оның ішінде жүк көліктері, жол жөндеу станциялары, жеңіл көліктер, манипулятор мен автогрейдер бар, — дейді Қанат Өсербаев.

Маманның айтуынша, қазіргі уақытта көктайғаққа қарсы материалдар да толық дайындалған.

Бұған дейін СҚО-да қыста жолда қалғандарға арналған 200-ден астам жылыту пункті ашылатынын жазған едік.

Ал 18 қазанда өңірде алғашқы қар жауды.