Сөмкесіндегі қауіпті олжа жолаушыға Жезқазғанға сапары мен 60 мың теңгесіне түсті

Шымкент әуежайында Жезқазғанға ұшпақ болған жолаушы тексерістен өте алмады. Оның сөмкесінен қызметкерлер 12 калибрлі патрон тауып алды. Әйел оқ-дәрі туралы білмейтінін айтқанымен, сот оны кінәлі деп танып, айыппұл салды, деп хабарлайды Tengri Travel.

Тараздың әкімшілік құқық бұзушылықтар жөніндегі мамандандырылған сотының мәліметінше, оқиға 2026 жылдың тамызында болған. Қазақстандық О. есімді азаматша Шымкент - Жезқазған бағыты бойынша ұшпақ болған.

"Тексеру аймағынан өту барысында қызметкерлер оның сөмкесінен тегіс ұңғылы аңшылық қаруға арналған 12 калибрлі патронды тапқан", - деп атап өтті сот өкілдері.

Сотта әйел кінәсін мойындады. Оның айтуынша, патрон сөмкесіне абайсызда түсіп кеткен, ал оның қайдан келгенін өзі де білмейді.

"Сотта азаматша О. кінәсін мойындап, патронды байқамай сөмкесіне салып алғанын және оның сөмкесінде қайдан пайда болғанын білмейтінін түсіндірді", - деп хабарлады сот.

Іс барысында криминалистік сараптама жүргізілді. Ол оқ-дәрінің зауыттық әдіспен дайындалғанын және атуға жарамды екенін көрсетті.

Жолаушының кінәсі хаттамамен, тараптардың айғақтарымен, сарапшы қорытындысымен және оның өз мойындауымен расталды.

"ӘҚБтК 482-бабы 1-бөлігінің санкциясы жеке тұлғаларға 20 АЕК мөлшерінде айыппұл салуды көздейді. Сот кінәсін мойындауды, өкініш білдіруді, бірінші рет құқық бұзушылық жасауды және ауырлататын мән-жайлардың жоқтығын ескере отырып, айыппұл мөлшерін 30 пайызға азайтты. Сот қаулысымен О. ӘҚБтК 482-бабының 1-бөлігі бойынша кінәлі деп танылып, оған 60 мың теңге көлемінде айыппұл тағайындалды. Тәркіленген патрон жойылуға жатады", - деп түйіндеді соттағылар.

Қаулы заңды күшіне енді.

Айта кетейік, жақында Көлік министрлігі жолаушыларға борттағы бомба, жарылғыш зат, қару, террористер, ұшақты басып алу немесе экипажға қатер төндіру туралы абайсыз қалжың жауапкершілікке және рейстің кешігуіне әкеп соқтыратынын ескертті. Мұндай қателік үшін 21,6 миллион теңгеге дейін айыппұл және 5 жылға дейін бас бостандығынан айыру жазасы көзделген.

Тағы оқыңыз: Танымал әнші мінген ұшақ қонғаннан кейін өртеніп кетті: алғашқы кадрлар

Бізді Google-дың негізгі дереккөздер тізіміне қосыңыз