СҚО да мамонттың сүйегі табылды

Солтүстік Қазақстан облысында мамонттың жоғары жақ және бассүйегі табылды. Оны Арықбалық ауылының тұрғыны байқап қалған.

Археологтардың айтуынша, бұл палеолит дәуіріне жататын жануардың қалдықтары болуы мүмкін. Енді оны тарихшылар зерттеп, қазба жұмыстарын жүргізбек. 

Арықбалық ауылының тұрғыны даладан осындай сүйектерге тап болған. Тарихшы Анатолий Плешаковтың айтуынша, бұл осыдан 15 мың жыл бұрын өмір сүрген жануардың қалдықтары болуы мүмкін. Ал оның арты үлкен тарихи жаңалыққа ұласуы ықтимал.

Анатолий Плешаков, тарих ғылымдарының кандидаты:

- Мамонт сүйектерінің жанында тастар бар. Соған қарағанда бұл ежелгі адамның тұрағы болуы мүмкін. Бұған дейін Солтүстік Қазақстан облысынджа мезолит дәуіріне жататын тұрақ табылған болатын. Сондықтан бұл өте жақсы олжа болуы тиіс.

Биыл Солтүстік Қазақстан облысында мамонт фаунасына жататын 4 сүйек табылды. Соңғы рет Есіл өзенінен алып жануардың жілігі шыққан болатын. Жалпы бұған дейін анықталған жәдігерлер тарихи – өлкетану музейінде сақталған.

Максим Сорочинский, облыстық Тарихи-өлкетану музейінің ғылыми қызметкері:

- Мамонт осыдан шамамен 8-10 мың жыл бұрын жойылып кеткен ірі жануар. Оған климаттық өзгерістер немесе алғашқы адамдардың аңшылығы себеп болуы мүмкін. Тарихи деректерге сүй енсек, олар Солтүстік Қазақстан облысында мекендеген.

Айыртау ауданынан табылған мамонттың жоғары ақ және бас сүйегі «Ботай» музей – қорығына тапсырылады. Ал, келер жылы онда қазба жұмыстары басталуы мүмкін.

Авторлары: Айдарбек Айтмұхамбетұлы, Қуаныш Қазбеков