Аргентинада 230 млн жыл бұрынғы динозаврдың сүйегі табылды

Адамзаттың даму тарихы мен мәдениетін зерттеуде археологияның алатын орны өте зор. Әр табылған жәдігер құнды тарихи мағлұматтар береді. Кейінгі жылдары әлемде сала өкілдері көптеген тың жаңалық ашты. АҚШ-та ғалымдар көне петроглифтерді тапса, аргентиналық археологтар жүздеген миллион жыл бұрын өмір сүрген динозаврдың сүйегін зерттеуді бастады.

АҚШ-тың Финикс қаласында археологтар көне петроглифтерді тапты. Тасқа қашалған суреттер қоры алғаш осыдан 50 жыл бұрын зерттелген, бірақ бұл жолы ғалымдар жартастардан жүздеген жаңа сурет анықтады. Зерттеулерге қарағанда олардың кейбірі 5000 жыл бұрын салынған болуы мүмкін. Археологтар жаңа табылған жәдігерлерді ресми тіркеп қана қоймай, мұнда мекендеген тайпалар мен олардың мәдени дәстүрлерін зерттеуге кірісті.    

Аргентинада ежелгі динозаврдың сүйегі табылды. Ғалымдарың зерттеуіне сүйенсек, жануар шамамен 230 млн жыл бұрын өмір сүрген. Мамандар бұл кезеңді алғашқы динозаврлар мен сүтқоректілердің пайда болған дәуірімен байланыстырады. Динозаврдың бас сүйек бөліктері, омыртқа, алдыңғы және артқы аяқтары жақсы сақталған. Қазба жұмыстары теңіз деңгейінен үш мың метр биіктікте жүрді. Кейінгі 50 жылда мұндай көне қазба алғаш рет табылып отыр.

Ал Мысырда ежелгі өркениетке арналған әлемдегі ең үлкен мұражай ашылды. Аумағы 500 мың шаршы метрді алатын музей Франциядағы әйгілі Лувр мұражайынан екі есе үлкен. Онда Тутанхамон қорғанынан алынған 6 мыңдай жәдігер бар. Жалпы 50 мың көне бұйымдар қойылған. Ашылу күні мұражайды 18 000-нан астам турист барып көрді. Сфинкс пен Гиза пирамидаларына жақын орналасқан орталықты Президент Абдул Фаттах ас-Сиси Мысыр тарихындағы жаңа кезең деп атады.

Авторы: Нұрбике Жігер