Старобельскідегі трагедия орнына 19 елдің журналистері аттанды Захарова

АСТАНА, 24 мамыр — Sputnik. Старобельск қаласындағы қайғылы оқиға болған жерге 19 елдің 50-ден астам журналисі аттанды, деп хабарлады РФ СІМ ресми өкілі Мария Захарова.

"Украина қарулы күштерінің Старобельскідегі колледжге жасаған шабуылы салдарынан болған трагедия орнына 50-ден астам шетелдік журналист жол тартты", — деп жазды ол өзінің Telegram каналында.

Олардың қатарында Австрия, Бразилия, Ұлыбритания, Венгрия, Венесуэла, Германия, Грекия, Испания, Италия, Катар, Қытай, Куба, Ливан, БАӘ, Пәкістан, АҚШ, Түркия, Финляндия және Франция журналистері бар. Барлығы 19 мемлекеттің БАҚ өкілдері жиналған.

"Токио өз журналистеріне бұл сапарға қатысуға тыйым салды. BBC ресми түрде бас тартты. Ал CNN демалыста", — деп толықтырды Захарова.

Бұған дейін Украина қарулы күштері 22 мамырға қараған түні Луганскідегі Старобельск кәсіптік колледжінің жатақханасына соққы жасағаны хабарланған болатын. Ресей Төтенше жағдайлар министрлігінің дерегіне сәйкес, 21 адам қаза тауып, 42 адам жараланған. Іздеу-құтқару жұмыстары аяқталды. Қала басшысы 24, 25 мамырды аза тұту күні деп жариялады.