Субсидияларды казинода жаратқан экс депутат миллиардтаған жымқыру бойынша күдікке ілінді

ҚМА Алматы облысы бойынша департаменті агроөнеркәсіптік кешенді қолдауға бөлінген бюджет қаражатын аса ірі көлемде жымқыру дерегі бойынша қылмыстық істі аяқтады, деп хабарлайды Tengrinews.kz.

Схеманы ұйымдастырған кім?

Тергеу мәліметтері бойынша, қылмыстық схеманы Алматы облысы Қарасай аудандық мәслихатының бұрынғы депутаты ұйымдастырған.

"Ауыл шаруашылығы саласындағы тәжірибесі мен мемлекеттік субсидиялау тетіктерін жетік біле отырып, ол бюджет қаражатын заңсыз алудың тұрақты схемасын құрған. Схеманы іске асыру үшін ұйымдастырушы өзіне бағынысты кәсіпорындар мен Алматы, Жамбыл және Түркістан облыстарында тіркелген 29 шаруа қожалығын пайдаланған", - деп хабарлады ҚМА.

Уәкілетті органдарға өнеркәсіптік таңқурай алқаптарын отырғызуға арналған элиталық таңқурай көшеттерін сатып алу туралы жалған құжаттар ұсынылғаны белгілі болды.

Ведомство мәліметінше, мәліметтердің анықтығын растау мақсатында жалған сатып алу-сату шарттары, қабылдау-тапсыру актілері, электрондық шот-фактуралар және отырғызу материалын өндірушілерді аттестаттау жөніндегі құжаттар рәсімделген.

"Алайда көрсетілген көлемде көшеттер іс жүзінде жеткізілмеген. Ал құжаттарда көрсетілген кейбір шаруашылықтардың өнеркәсіптік көлемде таңқурай өсіруге нақты мүмкіндігі болмаған. Нәтижесінде бюджеттен 2,6 миллиард теңгеден аса субсидия заңсыз алынған", - деп мәлімдеді ҚМА өкілдері.

Ведомство мәліметінше, заңсыз алынған субсидияның 491 миллион теңгесі қор нарығында операциялар жүргізуге бағытталған.

"Осы мақсатта күдіктінің жұбайының атына брокерлік шот ашылып, ол арқылы қазақстандық және шетелдік компаниялардың бағалы қағаздары сатып алынған. Бұдан бөлек, тағы 400 миллион теңге уақытша қаржылай көмек көрсету сылтауымен iSolutions Capital микроқаржы ұйымына аударылған. Кейін бұл қаражат күдікті тарапынан кезең-кезеңімен қолма-қол ақшаға айналдырылған", - деп түсіндірді ҚМА өкілдері.

Сондай-ақ күдікті ұрланған қаражаттың 170 миллион теңгесін Қонаев қаласындағы казинода құмар ойындарға жұмсаған.

ҚАЗІР ТАЛҚЫЛАНЫП ЖАТЫР

ІІМ ауқымды тексерістер қорытындысын жариялады: мыңдаған шенеунік жазаланды

Бүгін 08:57 2

"Мүлікке тыйым"

Сот санкциясымен күдіктілердің 4 пәтеріне, 3 автокөлігіне, жеке тұрғын үйіне және бағалы қағаздарына тыйым салынған. Үш күдіктіге қатысты қамауда ұстау түріндегі бұлтартпау шарасы қолданылды.

Қылмыстық іс сотқа жолданған.

Еске салсақ, 2025 жылдың сәуірінде Қаржылық мониторинг агенттігінің Алматы облысы бойынша департаменті бюджет қаражатын жымқыру және жылыстату ісінің егжей-тегжейін баяндаған болатын. Іс бойынша мәслихаттың экс-депутаты Бекет Әбішев пен басқа да тұлғалар күдікке ілінгені хабарланған еді.

Тергеу барысында Ауыл шаруашылығы министрлігі департаменттерінің бірінің бұрынғы директорының қатысы бары анықталды. Ол 2018–2022 жылдары Жамбыл және Түркістан облыстарында субсидия алу кезіндегі алаяқтық схемаға белсенді қатысқан.

Google News арқылы жаңалықтарымызды қадағалаңыз

Жазылу