Тағы бір газ баллон жарамын: Шахтинскідегі 5 қабатты үйдің жарылыс жайлы тың ақпарат шықты

Кеше түнде Шахтинск қаласындағы тұрғын үйлердің бірінде газ жарылып, салдарынан сегіз адам зардап шеккен. Бұл жағдайға күдікті ретінде полиция 40 жастағы ер азаматты ұстап, оның қасақана жасағанын алға тартты, – деп хабарлайды Aikyn.kz сайты Tengrinews.kz-ке сілтеме жасап.

Оқиға бес қабатты үйдің төртінші қабатындағы екі бөлмелі пәтерде болған.

Куәгерлердің айтуынша, бәрі газдың өткір иісінен басталған. Алаңдаған тұрғындар полиция шақырған. Оқиға орнына келген тәртіп сақшылары дереу эвакуацияны бастаған. Сол сәтте, көршілердің айтуынша, пәтердегі ер адам сіріңке жаққан.

"Алты жасар ұлыммен ұйықтап жатқан едім. Бір кезде есік қатты қағылды. Полицейлер тез сыртқа шығу керегін айтып, газ баллоны жарылуы мүмкін екенін ескертті. Дүрбелең басталып кетті. Полицейлер бізді асықтырып, көмектесті. Сыртқа шыққаннан кейін көп уақыт өтпей жатып жарылыс болды. Егер олар бізді уақытында шығармағанда, не боларын білмеймін. Олар мені және баламды құтқарды", - деді тұрғын Евгения Сайко.

Полиция мәліметінше, күдіктіні бірден ұстау мүмкін болмаған. Жарылыс кезінде эпицентрде болған полицейлер күйік алып, жарақаттанған. Осы сәтті пайдаланып, ер адам балкон арқылы қашып, көрші подъезге өткен. Ол жерден қарт әйелді шығарып, тағы бір газ баллонын жарамын деп қорқытқан. Кейін ол ұсталған. 

Айта кетейік, бұған дейін  Қарағанды облысы ПД баспасөз қызметі бөтен мүлікті қасақана жоюға әкеп соққан өрт дерегі бойынша қылмыстық іс қозғалатынын айтқан. Қазір жан-жақты және объектив тергеу жүргізіліп жатыр.