Таиландта парламент таратылды: жалпыұлттық сайлау ақпанда өтуі мүмкін

Таиландтың Орталық сайлау комиссиясы елдегі парламенттің таратылуына байланысты жалпыұлттық сайлауды ақпан айында өткізуге дайын екенін мәлімдеді, деп хабарлайды inbusiness.kz.

Бейсенбі күні премьер-министр Анутхин Чанвиракун парламентті тарату туралы шешім қабылдап, тиісті жарлық жобасын корольге жолдаған. Жұма күні құжат ресми жарияланды.

Орталық сайлау комиссиясының төрағасы Наронг Кланварин алдағы күндері сайлау мерзімі нақтыланатынын айтты.

«Меніңше, дүйсенбі немесе сейсенбіде жағдай белгілі болады. Комиссия сайлау кестесін әзірледі, біз дауыс беруді өткізуге толық дайынбыз», – деді ол.

Заңға сәйкес, король ұсынған кандидатура бекітілгеннен кейін сайлау 45–60 күн ішінде өткізілуі тиіс. Осы кезеңде премьер-министр үкіметті уақытша басқарады, алайда өкілеттігі шектеулі болады: ол жаңа бюджетті бекіте алмайды.

Алдын ала болжам бойынша, сайлау 8 ақпанда өтуі ықтимал. ОСК өкілдері Таиланд пен Камбоджа шекарасындағы шиеленісті мұқият бақылап отырғанын, шекарадағы жағдай саяси процеске кедергі келтірмеуі тиіс екенін атап өтті.

7 желтоқсанда Таиланд пен Камбоджа шекарасында қақтығыс қайта өршіді. Тараптар бір-бірін айыптап отыр. Бұған дейін екі мемлекет биыл АҚШ-тың арағайындығымен бітімге келген болатын.

Бүгін, 18:36