Таңғы ас ішу міндетті ме? : ғалымдар мен диетологтар нақты пікірін айтты

Көпшілік, соның ішінде дәрігерлер де таңғы асты ішпеу "зиянды әдет" деп есептейді. Бірақ соңғы жылдары бұл тұжырымға сыни көзбен қарайтындар көбейді, – деп хабарлайды Aikyn.kz сайты.

Себебі таңғы астың маңызы туралы кейбір қағидалар жарнамалық мақсатпен қалыптасқан болуы мүмкін.

Миф пе, шындық па?

Гарвард медицина мектебінің мәліметінше, «таңертең ұйқыдан кейін бірден таңғы ас ішу метаболизмді жылдамдатады» деген пікірді алғаш болып жарма өндірушілер ұсынған. Бұл идеяның ғылыми негізі әлсіз.

Индиана университетінің педиатры Аарон Кэрролл The New York Times-қа жазған мақаласында таңғы астың пайдасы туралы зерттеулердің көбі сенімсіз екенін, кейбірі мүдделі компаниялар тарапынан қаржыландырылғанын айтады.

Қашан таңғы ас ішу керек?

Дәрігерлердің айтуынша, таңғы асты міндетті түрде ұйқыдан кейін бірден ішу қажет емес. Адам өз денесінің қажеттілігін тыңдап, тамақ ішкісі келген кезде тамақтанғаны дұрыс. Егер сіз оянып, 1-2 сағаттан кейін ғана тамақ ішкіңіз келсе, бұл да – қалыпты жағдай.

Таңғы асты ішудің артықшылықтары

Диетологтар таңғы астың толыққанды болуының маңызын ерекше атап өтеді. Себебі таңғы ас:

- қандағы глюкоза деңгейін тұрақтандырады;

- түнде жұмсалған энергия қорын қалпына келтіреді;

- аштық сезімін азайтып, күнді тиімді бастауға көмектеседі;

- ойлау қабілеті мен зейінді арттырады (әсіресе оқушылар мен студенттерге маңызды).

Дұрыс таңғы ас қандай болуы керек?

Сапалы таңғы ас құрамында міндетті түрде үш негізгі қоректік топ болуға тиіс:

- Ақуыздар: жұмыртқа, ет, балық, ірімшік, бұршақ, тофу.

- Көмірсулар мен талшықтар: көкөністер, жемістер, ботқа (ұзақ пісетін), макарон (қатты бидайдан), дәнді нан.

- Майлар: сары май, жұмыртқа сарысы.

Диетолог Дарья Русакова: «Ақуыз бен талшықтың үйлесімі ағзаны ұзақ уақыт бойы адамды тойынған күйде ұстап, тамақты артық жеп қоюдан сақтайды. Бұл дене салмағын бақылауда ұстауға көмектеседі», – дейді.

Таңғы асқа ең жақсы тағамдар

- Лосось немесе тауық еті + жұмыртқа / омлет.

- Ірімшік + көкөніс не жеміс салаты.

- Бүтін дәнді нанды да қосуға болады.

- Ішуге: тәтті емес кофе, шай, цикорий, шиповник шайы.

Қандай тағамдардан аулақ болу керек?

- Фруктозасы көп шырындар: себебі әсіресе ашқарынға қан құрамындағы қантты тез көтереді, бірақ тойымдылық ұзаққа созылмайды.

- Қантты, ұнды жармалар: бұл – тез көмірсулар, артық салмақ жинауға әкелуі мүмкін.

- Кофе: ашқарынға жиі ішсеңіз, асқазанға зияны болуы мүмкін. Бірақ толыққанды таңғы аспен бірге ішу — рұқсат.

Таңғы ас – барлық адамға міндетті емес, бірақ оны дұрыс таңдаса, өте пайдалы болмақ. Сол үшін де оның уақытын да, құрамын да өз қажеттілігіңізге бейімдеп таңдаған жөн. Ең бастысы – ағзаңызды тыңдап, сапалы, теңгерімді тағамдарды қолдану.