Тарихты тұлғалар жасайды

Алматылық жастар мемлекет және қоғам қайраткері, көрнекті ақын Кәкімбек Салықовты еске алды.

Кеш «Жас ұрпақ» ақпараттық-ағартушылық патриоттық орталығының ұйымдастыруымен өтті. Басқосуда ақынның шығармашылық мұрасы мен мемлекеттік қызметте жүріп, ел дамуына қосқан елеулі еңбектері кеңінен айтылды. Шараны Медеу ауданының әкімдігі «AMANAT» партиясымен бірлесіп ұйымдастырды.

Кәкімбек Салықов мемлекеттік қызмет пен әдебиетті ұштастыра білген жан. Ақын, жазушы, композиторлықпен қоса, лауазымды қызметтерді абыроймен атқарды. Ақынның шығармалары әлемнің көптеген тілдеріне аударылып, өлеңдеріне ән жазылған. Атақты «Жезкиігі» қазақ даласын дүр сілкіндірді. Кәкімбек Салықов сонымен қатар, көркем аударма шебері атанды. Шара ашық диалог түрінде өтті. Онда ұйымдастырушылар жастарға тарихи тұлға жайында кеңінен айтып берді.

Бақтияр Қамалов, «Жас ұрпақ» ақпараттық-ағартушылық патриоттық орталығының жетекшісі:

- Біз әр шара сайын Оқушылар сарайында 600-ге жуық жасты жинаймыз. Оларды ел дамуына үлес қосқан тарихи тұлғалардың өмірі мен еңбек жолымен таныстырамыз. Фильм көрсетеміз, сұрақтарына жауап береміз. Негізгі мақсат жастарымыздың  өз тарихын, өз тұлғаларын білуіне мүмкіндік жасау.

«Жас ұрпақ» орталығы тарихи тұлғаларға арналған шараларды жиі өткізіп тұрады. Бұл жолғы кешке арқау болған қазақ поэзиясының классигі Кәкімбек Салықов шығармашылықпен қоса, Арал мен Каспийге қатысты  экология мәселесімен де айналысты.

Бақтияр Қамалов, «Жас ұрпақ» ақпараттық-ағартушылық патриоттық орталығының жетекшісі:

- Біз Жұмабек Тәшеновке арналған іс-шара өткіздік. Ол Кеңес Одағы кезінде бес облысты сақтап қалған тұлға. Сонымен қатар елімізге Тайқазанды алып келген қоғам қайраткері Өзбекәлі Жәнібековке арнап  кеш өткіздік. Қазақстан Компартиясы Орталық Комитетінің бірінші хатшысы қызметін атқарған Жұмабай Шаяхметов пен ғалым-заңгер, көрнекті мемлекет қайраткері Нағашыбай Шәйкенов туралы шаралар да жастардың қызығушылығын тудырды.

«Жас ұрпақ» орталығы мұндай кездесулерді бес жылдан бері ұйымдастырып келеді. Алдағы уақытта да көрнекті тұлғаларды ұлықтауға арналған шаралар жалғасады. 

Авторлары: Қарлығаш Қайыпбекова, Сержан Жұмабаев