Тәттіге құмарту ағзаға қалай әсер етеді?

Ауру астан. Елде жасөспірімдер арасында қант диабеті асқынып тұр. Тіпті ТМД аумағында алдыңғы қатарда. 

Дерт – фастфуд пен тәтті сусындардың кесірінен дендеп кеткен. Энергетикалық сұйықтықтар бойыңа күш беру орнына, нәріңді сарқып тастайды. Шаршау былай тұрсын, салдарынан балалардың тілі шықпай қалатын жағдайлар аз емес. Жүрек ауруларына, психикалық бұзылыстарға және семіздіктің де себебі жоғарыда аталған ішіп-жемнен. Түнде ұйқысы қашады, имунитеті күйрейді. Балалар неврологы осылай дабыл қағып отыр. Аналар да абай болғаны абзал. Өйткені сүт арқылы сәбидің денсаулығына кері әсер етеді. «Алайда сауда нүктелерін айтпағанда мектептерде де оған мән берілмейтіні өкінішті», - дейді маман. 

Қайырғали Көнеев, балалар неврологы:

- Тілі шықпаған балаға аса қатты зиян. Ондай сусындарға көп көлемде қант қосылады. Тәбеті төмендейді. Зейіні төмен болады... 

Асхат Аймағамбетов, ҚР Парламенті Мәжілісінің депутаты:

- Энергетикалық сусындар мәселесі бойынша арнайы акцизді енгіздік. Сосын мемлекет тарапынан реттеу, оны арнайы бір жерлерде сату. Және ең бастысы ол ағарту, ол тәрбие жұмысы. Көбіне біз бұл проблеманы ағарту жұмысы арқылы шешуге ықпал етуіміз керек. 

Олқылықтың орны толуы тиіс. Премьер-министр балалар мен жасөспірімдердің фастфуд пен энергетикалық сусындарға құмарлығына назар салды. Құзырлы органдарға білім беру ұйымдарына «тосыннан кіріп келу» қағидатын іске асыруды тапсырды. Яғни, бақылау мен қадағалауға қырағы болуды нықтады. Ал, сала министріне қауіпті жағдайға тойтарыс беру үшін ұтымды ұсыныстар енгізуді міндеттеді.