Таза Қазақстан бастамасын бақылайтын мониторинг орталығы құрылады

«Таза Қазақстан» Президент бастамасының жүзеге асырылу барысына мониторинг жүргізетін орталық құрылады. Оған Премьер-министр төрағалық етеді. Жауапты мемлекеттік органдар жүргізіліп жатқан жұмыс туралы ай сайын баяндайтын болады. 

Бүгінгі жиында экологиялық акцияның қалай жүргізіл жатқаны жайлы аймақ басшылары есеп берді. Абай және Ұлытау облыстарында «Таза Қазақстан» бойынша жұмыс қарқыны баяу жүріп жатыр. Бұл аймақтарда заңсыз қоқыс полигондарының тек 36% және 53%-ы ғана жойылған. Ал Ақмола, Ақтөбе және Қызылорда облыстарында ағаш отырғызу және тұқым жинау бойынша кемшіліктер бар. Премьер-министр Олжас Бектенов өңір әкімдерін сынға алды. Енді Ақтөбе, Атырау, ШҚО, БҚО, Қарағанды, Қостанай және Жетісу облыстарының әкімдіктері жыл соңына дейін заңсыз қоқыс алаңдарын жою жұмыстарын аяқтауы қажет. Полигондар құрылысын жеделдету тапсырылды. 

Олжас Бектенов, ҚР Премьер-Министрі:

- Президентіміздің «Таза Қазақстан» бастамасы кең ауқымды жалпыұлттық қозғалысқа айналды. Мәселе тек ағаш отырғызу және қоқыс тазарту туралы болып отырған жоқ. Табиғатты қорғау идеясына бүкіл қоғамды біріктіру, жайлы да таза қоршаған орта қалыптастыру ісіне әрбір адамның белсенді қатысуы – біздің жұмысымыздың басты нәтижесі болуға тиіс. 

6,5 млн адам экологиялық акцияға қатысқан 

Жалпы биыл 6,5 млн адам экологиялық акцияларға қатысқан. Премьер-министрдің орынбасары, мәдениет және ақпарат министрі Аида Балаева «Адал азамат» бағдарламасының экологиялық мәдениетті нығайтудағы рөлін атап өтті. Оқушылардың 87%-ы экология бағытындағы қосымша біліммен қамтылған. 35 жоғары оқу орнында экология мамандарын дайындайды, ал еріктілердің қатарына студенттердің қатысу көрсеткіші 45%-ды құрады. 

Президенттің орман қоры аумағында 2 млрд ағаш отырғызу жөніндегі тапсырмаларын жүзеге асыру барысы жеке мәселе ретінде қаралды. 2021–2025 жылдары 1,5 млрд жуық ағаш егілді. 320 млн көшет отырғызылды. Арал теңізінің құрғаған түбін көгалдандыру бойынша да халықаралық жобалар іске асуда. Қазалы қаласында 3 млн сексеуіл көшеттері бар тәлімбақ салынды. Жиында «Арал Орманы» резерватын құру бойынша жұмыстар жүріп жатқаны да айтылды. 

Аида Балаева, ҚР Премьер-Министрінің орынбасары, мәдениет және ақпарат министрі:

- «Әлеуметтік желілерде экологиялық қозғалыстың белсенді субьектісі – жастар. Мемлекет басшысы «Таза Қазақстан» экофестивальіне қатысып, бастаманың мән-маңызын одан әрі арттырды. Мониторинг нәтижесі бойынша 10 өңірден іріктелген экоблогерлер мен белсенділер «Таза Қазақстан» бастамасын жүйелі түрде насихаттап, өз аймақтарында тазалық акцияларын өткізуде. Бұл қоғамда экологиялық жауапкершілік, азаматтық мәдениеттің негізі деген идеологияның орнығып келе жатқанын айқын көрсетеді.