Тазыларды кімдер және неге атып жатыр?

Қарағандыда қаңтар айының ортасында Қазақстанның мақтанышы саналатын тазы тұқымды иттерді атып кетті, деп хабарлайды Arasha.kz сайты eKARAGANDA.KZ-ке сілтеме жасап.

«Жануарларға жауапкершілікпен қарау туралы» ҚР Заңының нормаларына қарамастан, Қарағандыда иттерді, оның ішінде тазыларды ату деректері әлі де тыйылмай тұр. Осындай оқиғаның бірі қаңтардың ортасында орын алды. Енді ит иелері сотқа шағымданбақ ниетте», — делінген дүйсенбі күні тараған хабарламада.

Ақпаратқа сүйенсек, оқиға Ақтас кентіндегі жекеменшік панажай аумағында болған. Белгісіз тұлғалар осымен неше мәрте тазыларды улы жебемен атып жүр.

«Панажай иесі Александр Котеля бұл орынды өз қаражатына ұстап отыр. Ол 20 жылдан астам уақыт бойы тазы тұқымын сақтап қалумен айналысып келеді. Алайда, 13 қаңтар күні ол панажай аумағынан екі иттің өлі денесін тапқан. Айтуынша, жануарлар жебемен атылған. Сонымен қатар тағы үш ит жоғалып кеткен, олардың қайда екені әлі белгісіз», — деп нақтылайды басылым.

Александр иттерді өз ақшасына азықтандырып, вакцина ектіріп, күтім жасап келгенін айтады.

«Панажай аумағы биік қоршаумен қоршалған, бейнебақылау камераларын да орнаттым. Бірақ бұл иттерді аман алып қалуға көмектеспеді. Мұндай жағдай бірінші рет емес — осыдан үш апта бұрын иттерді ата бастаған еді», — дейді панажай иесі.

Бұдан бөлек, оның танысының Қарағандыдағы жеке үйінде болған тазы иті де оққа ұшқан. Бұл жағдай 15 қаңтарда орын алған.

«Біз полиция шақырттық. Бейнежазба арқылы атқан адамды анықтадық, ол ветеринариялық станцияның қызметкері болып шықты. Екі жағдайда да адам жекеменшік аумаққа кіріп, жануарларды өлтірген. Мен учаскелік полиция қызметкеріне хабарласып, 13 қаңтардағы бейнежазбаларды тексеруді сұрадым, өйткені оның жазбаларға рұқсаты бар. Бірақ олар тексергісі келмей отыр. Істі әрі қарай қозғамады, тек сотқа жүгінуге кеңес берді. Дегенмен, атқан адамның кінәсін мойындап, түсініктеме бергені бізге белгілі. Біз сотқа талап арыз түсіреміз», — деп қосты Котеля.

Облыстық Полиция департаментінің (ПД) баспасөз қызметі 17 қаңтарда Қарағанды тұрғынынан ит ату дерегі бойынша арыз түскенін растады. Бірақ құжат қараусыз қалдырылған.

«Қызметкерлер арызды қабылдап, тексеру жүргізді. Иттерді ветеринариялық станция қызметкері атқаны анықталды. Бұл жағдайда азаматтық-құқықтық қатынастар байқалғандықтан, арызданушыға сотқа жүгіну ұсынылды», — деп түсініктеме берді ПД өкілдері.

Ал Ветеринария басқармасы әзірге атқан адамның өз қызметкері екенін растаған жоқ.

«Еске сала кетейік, тазы тұқымды иттер Қазақстанның ұлттық қазынасы саналады», — деп түйіндейді басылым.