Тегерандағы қақтығыс: Иранда тағы бір жоғары шенді генерал қаза тапты

Иран Ислам революциясы сақшылар корпусы (КСИР) барлау қызметінің басшысы, бригадалық генерал Маджид Хадеми 6 сәуір күні таңертең жасалған шабуыл салдарынан қаза тапты, деп хабарлайды Arasha.kz.

КСИР өкілдері оның қазасының нақты мән-жайын ашып айтпағанымен, Хадемидің барлау және қауіпсіздік саласында жарты ғасырға жуық уақыт бойы адал әрі батыл қызмет еткенін атап өтті.

Өз кезегінде Израильдің қорғаныс министрі Исраэль Кац та оның қаза тапқанын растап, Израиль әскері "террористік ұйым жетекшілерін жоюды жалғастырып жатқанын" мәлімдеді.

"Иран басшылары үнемі өздерін аңдып жүргендей сезінеді. Біз оларды бірінен соң бірін іздеп табуды жалғастырамыз", – деп келтіреді оның сөзін Associated Press.

Айта кетейік, Маджид Хадеми КСИР барлау қызметінің басшысы қызметіне 2025 жылдың маусым айында тағайындалған. Ол бұл қызметке өзінен бұрынғы басшы Мохаммад Каземи Тегеранда жасалған израильдік соққы кезінде қаза тапқаннан кейін келген еді.

Сонымен қатар, 2026 жылдың қаңтар айында АҚШ Қаржы министрлігі Хадемиге қарсы санкциялар енгізген. Вашингтон оның басшылығындағы барлау қызметі наразылықтарды басу мақсатында зорлық-зомбылық, заңсыз ұстау және қорқыту әрекеттерін қолдады деп айыптаған.