“Тек қолма қол ақшамен“ астаналық тұрғын аяқ киім сатушыдан өтемақы өндіріп алды

Астана тұрғыны дүкенге әйелдер аяқкиімін алуға келген, бірақ сатушы банк картасымен төлем қабылдаудан бас тартқан. Сонымен қатар, сатып алушыға тауар сатпай, оның сауда нүктесінен шығуын талап еткен. Ер адам сотқа жүгінді, деп хабарлайды Tengrinews.kz.

Сатушы картамен төлем қабылдаудан бас тартты

Астананың азаматтық істер жөніндегі ауданаралық сотының мәліметінше, наурыз айында елорда тұрғыны сауда нүктесінен үш жұп әйелдер аяқкиімін сатып алмақ болған. Ол тауар ақысын банк картасымен төлегісі келген, алайда сатушы қолма-қол ақшасыз төлемді қабылдаудан бас тартқан.

Осыдан кейін сатып алушыға тауар сатудан бас тартылып, оның дүкеннен шығып кетуі талап етілген.

Оқиға бейнежазбаға түсіп қалған. Сондай-ақ, бас тарту фактісін тараптардың түсініктемелері мен сатушының айғақтары растады.

Сот сатушының тауарды ұсыну мүмкіндігі бола тұра, жария шарт жасасудан бас тартуға құқығы жоқ екенін көрсетті. Сонымен қатар, тұтынушылардың құқықтарын қорғау туралы заңнамада сатып алушының тауарды еркін таңдау құқығы қарастырылған.

Сот Қазақстанда төлемдер қолма-қол ақшамен де, қолма-қол ақшасыз нысанда да жүзеге асырылуы мүмкін екенін ерекше атап өтті.

Осылайша, сатып алушының картамен төлеуді таңдауына байланысты тауарды сатудан бас тарту негізсіз деп танылды.

Сот жеке кәсіпкердің әрекетін заңсыз деп тапты. Сатушыдан талап қоюшының пайдасына моральдық зиян өтемақысы мен сот шығындары өндірілді.

Талап арыз ішінара қанағаттандырылды.

Сот шешімі әлі заңды күшіне енген жоқ.

Еске сала кетейік, бұған дейін Қазақстанда клиенттерден тек қолма-қол ақшамен төлеуді талап еткен кәсіпкерлерге қатысты шағымдар түскен болатын. Ол кезде Мемлекеттік кірістер комитеті қолма-қол ақшасыз төлемді қабылдаудан бас тарту заңсыз екенін түсіндірген: сатып алушы банк картасымен, QR арқылы немесе қолма-қол ақшамен төлеуге құқылы.

Бізді Google-дың негізгі дереккөздер тізіміне қосыңыз