Теміртау қаласында таксиге жолақыны ерекше тәсілмен төлеуге болады

Теміртау қаласында таксиге жолақыны ерекше тәсілмен төлеуге болады.

TAXIDEGI QUIZ жобасы аясында жолаушылар діттеген жеріне, қазақ тіліндегі қарапайым сұрақтарға дұрыс жауап беру арқылы, тегін жете алады. Жобаның мақсаты - мемлекеттік тілді үйренуге көпшіліктің қызығушылығын ояту.

Теміртаулықтар бұл такси қызметін ерекше жақсы көреді. Жобаның жүргізушісі Арман Әбілқасымов сұрақ қояды, ал жолаушы жауап береді. Сұрақтар қарапайым, күнделікті өмірде жиі пайдаланатын сөздер аясында қойылады. Егер дұрыс жауап берілсе  қаланың кез-келген  жеріне тегін жеткізеді. Мұндай шағын сабақ адамдарға білімін тексеруге және мемлекеттік тілді үйренсем деген ынтасын арттыруға көмектеседі.

Арман Әбілқасымов, TAXIDEGI QUIZ жобасының жүргізушісі:

- Тілдің деңгейін тексеру емес, оны насихаттау болғандықтан оңай сұрақтар қоямыз. Білесіз бе, өзге ұлт өкілдерінің көбісі  қазақ тілін жақсы біледі екен. Бірақ оны көрсетуге ұялады. Ойын жеткізе алады, бірақ сөйлеуге қысылады. Біздің жобамыздан кейін олар бізге алғыс айтып жатады.

Анна Пириева сән салонында жұмыс істейді. Ол жұмыста , дүкенде, тіпті емханаларда қазақ тілінде  сөйлеуге тырысады. Соның арқасында едәуір жаттығып қалды. Білімін тексеру үшін ол осы таксиді шақырған.

Сұрақтарға дұрыс жауап бергені  үшін Анна жұмысқа тегін жетіп қана қоймай, шағын сыйлық та алды.

Анна Пириева, Теміртау қаласының тұрғыны:

- Бұл мен үшін өте қызықты әрі танымдық дүние болды. Алған әсерім керемет! Тілді тез меңгеру үшін осылай күнделікті сөйлесіп жүрген жөн. Мен жалғауларға келгенде  аздап қиналамын. Біртіндеп оны да үйреніп аламын.

TAXIDEGI QUIZ жобасын Теміртау ресурстық тіл орталығының мамандары жүзеге асырды. Ұйымдастырушылардың айтуынша, оған қала тұрғындарының қызығушылығы жоғары. Ерекше қызметті пайдаланғысы келетіндер саны күн сайын артып келеді.

Гүлнар Әкішбаева, Теміртау қаласы Ресурстық тіл орталығының директоры:

- Таксидің өзінің шарттары бар. Мемлекеттік тілде викторина сұрақтар қойылады. Ән айтуға болады, өлең оқуға болады, тек қана мемлекеттік тілде. Тағы бір айта кететіні, бұл жоба өзге ұлт өкілдері арасында өткізіледі.

Таксидегі мұндай квиз -қазақ тілін үйренуді күнделікті өмірдің бір бөлігіне айналдырудың жарқын үлгісі. Кейде жаңа сөзді немесе бір тіркесті үйрену үшін бір ғана сапар жеткілікті. Жобаны 2026 жылы Қарағанды қаласында да енгізу жоспарланып отыр. 

Авторлары: Руслан Нұрланұлы, Аман Хамит