Теміртауда 200 шақырымнан астам жылу желісі жаңартылады

Теміртауда алдағы жылдары 200 шақырымнан астам жылу желісін жаңарту жоспарланып отыр.

Ермағанбет Бөлекпаев жұмыс сапары барысында қаланың жылыту маусымына дайындығын тексерді.

Өңір басшысы бұған дейін Ескі қаланы жылумен қамтамасыз ететін КарГРЭС-1 станциясының жұмысына қатысты сын айтылғанын еске салды. Атап айтқанда:
– апаттар;
– жабдықтардың тозуы;
– температуралық режимнің бұзылуы мәселелері көтерілген.

Қазір кәсіпорында жөндеу жұмыстары жүргізіліп жатыр.

Станция директоры Жандос Медеуовтің айтуынша:
– №9 қазандық толық жөндеуден өткен;
– №11 қазандықта ағымдағы жөндеу жүріп жатыр;
– кейін №10 қазандыққа күрделі жөндеу басталады.

Сонымен қатар жаз мезгілінде екі турбинаға ағымдағы және орташа жөндеу жүргізу жоспарланған.

Ермағанбет Бөлекпаев барлық жұмыстың қатаң кесте бойынша орындалуы қажет екенін айтты.

«Негізгі міндет – станцияны “қызыл аймақтан” шығару», – деді аймақ басшысы.

Қазіргі уақытта Оқжетпес-Т компаниясымен бірлесіп, 2026–2028 жылдарға арналған жылу желілерін жаңарту бағдарламасы әзірленген.

Бағдарлама үш кезеңнен тұрады және қаладағы 200 шақырымнан астам жылу желісін жаңартуды көздейді.