Теміртауда қарақшылық жасады деген күдікті айдауылдан қашып кетті

Тонау жасады деп күдікке ілінген ер адам медициналық куәландыруға бара жатқан жолда айдауылдан қашып кеткен, деп хабарлайды Arasha.kz.

Ол екі тәуліктен кейін қайта ұсталды. Осы оқиғадан соң полиция басшылығына қатысты тәртіптік шаралар қолданылды.

Оқиға Теміртау қаласында орын алған. Ұсталған азаматты медициналық мекемеге сараптама жасау үшін алып бара жатқанда, ол оңтайлы сәтті пайдаланып, қашып үлгерген.

Іздеу жұмыстары екі күнге жуық жалғасты. Нәтижесінде ер адам табылып, қайтадан қамауға алынды. Қазіргі уақытта ол уақытша ұстау изоляторында  отыр.

Күдікті қашып кеткеннен кейін Қарағанды облыстық ПД-де тәртіптік комиссияның отырысы өтті.

«Тексеру жүргізіліп, оның қорытындысы бойынша бірқатар қызметкерлерге тәртіптік жаза қолданылды», - деп хабарлады полициядан.