“ТК бола ма“? Егізбаев көшесіндегі бос жатқан жер алматылықтардың назарын аударды

Бостандық ауданының тұрғындары Егізбаев көшесіндегі үйлердің маңында жүріп жатқан жұмыстарға алаңдаушылық білдірді. Tengrinews.kz тілшісі әкімдіктен ол жерде не салынып жатқанын анықтады.

Оқырмандар үндеуі

Егізбаев көшесінің бір бөлігінде қарқынды жұмыс басталды.

"Бос жатқан жерді тазалап тастады. Оған дейін ұзақ уақыт қоршау тұрған еді. Қасында жол салынып жатыр. Ал мұнда не болады? Бизнес-орталыққа арналған аумақ па? Әлде тұрғын үй кешені салына ма?" - деп сұрады олар редакциядан.

Біз жағдайға қатысты пікір алу үшін әкімдіктің баспасөз қызметіне хабарластық.

Егізбаев көшесінде не болып жатыр?

Кейінгі бірнеше айда бұл учаске тұрғындар назарына бірнеше рет ілікті.

Жазда бұл маңда ағаштар кесіле бастады. Әкімдік мұны тағы жол құрылысымен түсіндіріп, аумақты абаттандыруға және өтеміне ағаш отырғызуға уәде берді. Қыркүйекте құрылыс қарқыны артты: шұңқыр қазылып, коммуникацияларды көшіру және жолдың негізін дайындау жұмыстары басталды. Сол кезде әкімдік жұмыс қазанда аяқталатынын айтқан.

Енді тұрғындар үйлердің маңында тазаланған тағы бір үлкен алаңды байқаған.

Суреттерден аумаққа қиыршық тас төселгенін, периметрі бойынша бордюр орнатылғанын көруге болады. Қала тұрғындары жұмыс ауқымына қарап, бұл жерде жаңа тұрғын үй кешені пайда болуы мүмкін деп болжады.

Фото Tengrinews.kz

Фото Tengrinews.kz

Tengrinews.kz бұл учаскеде нақты не салынып жатқанын білу үшін әкімдікке қайта жүгінді.

Бұл жерде не болады?

Мәселе үш жобаға қатысты екені белгілі болды:

мектепке баратын жол, 100 көлікке арналған тұрақ, жаяу жүргіншілер аймағы.

Жол инфрақұрылымын дамыту басқармасы Егізбаев көшесі, 9 мекенжайындағы мектепке баратын жол салынып жатқанын түсіндірді. Ол Егізбаев пен Жандосов көшелерін қосуы тиіс. Оның маңында 100 көлікке арналған тұрақ пайда болады.

"Бұл білім беру нысанына көлік қолжетімділігін қамтамасыз етуге, шағынаудан ішіндегі қозғалысты ұйымдастыруды жақсартуға мүмкіндік береді", - деп хабарлады ведомство.

Фото Tengrinews.kz

Әкімдік бұған дейін құрылысқа қажет жер учаскелерін сатып алған. Олардағы нысандар бұзылды. Қазір жұмысшылар инженерлік коммуникацияларды көшіріп, арық салып, жол негізін дайындап жатыр.

"Ені 3,5 метр болатын жол мен тротуар төселіп қойды. Екінші жолақ пен қарама-қарсы беттегі тротуарды салу жұмыстары жалғасып жатыр", – деп нақтылады басқарма.

Осылайша, тұрғындар болжаған тұрғын үй кешені орнына бұл учаскеде 100 көлікке арналған тұрақ болады.

Фото Tengrinews.kz

Жаяу жүргіншілер аймағы жасалады

Бостандық ауданы әкімінің аппараты "Халық қатысатын бюджет" бағдарламасы бойынша бөлек жобаны іске асырып жатыр.

№ 224 мектеп маңындағы жаңа жол бойында жаяу жүргіншілер аймағы пайда болады.

"Абаттандыру жұмыстары кешеніне тротуар салу, көше жарығы жүйесін орнату, орындықтар мен қоқыс жәшіктерін қою, сондай-ақ іргелес аумақты көгалдандыру кіреді", – деп хаюарлады әкімдік.

Фото Tengrinews.kz

Фото Tengrinews.kz

Нысан паспортында жұмыс 2026 жылғы қыркүйектен желтоқсанға дейін жүргізіледі деп көрсетілген. Тапсырыс беруші – Бостандық ауданы әкімінің аппараты, мердігер – "DAC CITY LTD" ЖШС.

Редакция жұмыс барысын бақылайды.

Бізді Google-дың негізгі дереккөздер тізіміне қосыңыз

Қосу