Төле бидегі жаңа аялдама алматылықтардың сауалын тудырды: әкімдік не дейді

Алматылықтар Төле би мен Момышұлы көшелері қиылысындағы бұзылған павильонның орнына қойылған аялдамаға назар аударды. Тұрғындардың айтуынша, таңертең бұл жерде жолаушылар көп жиналады, ал жаңа конструкция тым тар. Tengrinews.kz бұрынғы кешен не себепті алынып тасталғанын және оның орнында не болатынын анықтады.

"1,5-те 3 метр екі конструкция": не болды?

Мәселе Төле би – Момышұлы көшелері қиылысындағы жаңа аялдама туралы болып отыр. Жазба авторы екі шағын павильонды көрсетіп, таңертең мұнда автобус күткен халық көп жиналатынына шағымданды.

"Төле би – Момышұлындағы аялдаманы бұзып тастады. Енді орнына жаңасын (тырнақша ішінде) қойып жатыр. Таңертең автобус күткен адамдар сыймайтын үлкен аумаққа өлшемі 1,5-те 3 метр болатын екі конструкцияны әкеліп қойды", – делінген жарияланымда.

Threads желісіндегі жазбаның скриншоты

Сонымен қатар автор бұрын ұқсас павильондар Наталья Сац атындағы театр маңында жанында тұрғанын атап өтті.

Төле би – Момышұлы көшелері қиылысындағы аялдама кешені алматылықтарға жақсы таныс. Мұнда жылдар бойы дүкендер, дәмханалар және басқа да сауда нүктелері жұмыс істеп келді. Алайда бұл кешен тиісті рұқсат құжаттарынсы салынғаны белгілі болды.

Қала құрылысын бақылау басқармасының мәліметінше, ведомство 2022 жылғы 19 шілдеде нысанды бұзу туралы талап арыз берген. Содан бері бірнеше жыл бойы сот талқылаулары өтті.

"Нәтижесінде Алматы қалалық соты бірінші сатыдағы соттың нысанды бұзу туралы шешімін өзгеріссіз қалдырды, ал атқару парағы әділет департаментіне түсті", – деп хабарлады басқарма.

Фото: Алматы әкімдігі

Осыдан кейін сот орындаушылары 2026 жылдың қыркүйегінде кешенді бұзды.

Қазір Төле би – Момышұлы көшесіндегі үлкен кешен орнында екі шағын аялдама тұр.

Дегенмен, Жол қозғалысын ұйымдастыру және жолаушылар көлігі басқармасы алматылықтарды сабырға шақырып, бұл уақытша шешім екенін айтты. Олар жаңа аялдамаларды сатып алып, орнату бойынша конкурс өткізілгенге дейінгі кезеңге қойылған.

"Конкурс қорытындысы шығарылып, мердігер ұйым анықталғаннан кейін, уақытша конструкциялар жолаушылар ағыны мен қоғамдық көлікті күтуге жайлы жағдай жасау қажеттілігі ескеріле отырып, жаңа аялдама павильондарына ауыстырылады", – деп хабарлады басқарма өкілдері.

Бұл ретте ведомство аялдамалар қашан ауыстырылатынын, жаңа павильондар өлшемі мен сыйымдылығы қандай болатынын нақтылаған жоқ.

Еске сала кетейік, бұған дейін алматылықтар Алматы-1 вокзалы маңындағы аялдамалардың бұзылуына шағымданған еді. Әкімдік павильондар вокзал реконструкциясы аясында алынғанын түсіндірді. Олардың орнына жаңа аялдамалар орнатылады, бірақ нақты мерзімі әлі белгісіз.

Тағы оқыңыз: Алматы-1 вокзалындағы аялдамалар бұзылып жатыр: әкімдік себебін түсіндірді

Бізді Google-дың негізгі дереккөздер тізіміне қосыңыз