Төлемдердің 90 пайызы онлайн форматта жүзеге асырылады Ұлттық банк төрағасы

Соңғы бес жылда Қазақстанда қолма-қол ақшасыз төлемдер көлемі он есеге артты.
Қазіргі таңда елдегі барлық төлемнің шамамен 90 пайызы онлайн форматта жүргізіледі. Бұл туралы Алматыда өтіп жатқан Central Asia Fintech Summit форумында Ұлттық банк төрағасы Тимур Сүлейменов мәлімдеді.

Ұлттық банк басшысының айтуынша, цифрлық қаржы жүйесінің дамуына мемлекет тарапынан көрсетіліп жатқан қолдау зор. Төлем айналымының шамамен 90 пайызы Ұлттық төлем корпорациясының инфрақұрылымы арқылы өтеді.

«Барлық операция нақты, кідіріссіз жүргізіледі, жүйенің сенімділік деңгейі – 99,99 пайыз. Биылғы тоғыз айдың ішінде транзакциялар көлемі 1 квадриллион теңгеден асты. Жыл соңына дейін бұл көрсеткіш бұдан да жоғары болмақ», – деді Тимур Сүлейменов.

Сонымен қатар ол бүгінде қаржы қызметтерінің басым бөлігі цифрлық форматта қолжетімді екенін атап өтті. Азаматтар онлайн режимде банк шотын ашу, несие рәсімдеу, төлемдер жасау және мемлекеттік қызметтерді алу мүмкіндігіне ие. Ұлттық банк базасында ай сайын шамамен 4 миллион өтінішті өңдейтін биометриялық сәйкестендіру сервисі жұмыс істейді.

Тимур Сүлейменовтің айтуынша, цифрлық технологиялармен қатар киберқауіптердің де көлемі өсіп келеді. Осыған байланысты өткен жылы Ұлттық банк базасында антифрод орталығы іске қосылған.

Бұл орталық Ұлттық банк, Қаржы нарығын реттеу және дамыту агенттігі, екінші деңгейлі банктер, ірі микроқаржы ұйымдары, құқық қорғау органдары мен телеком-операторлардың антифрод жүйелерін біріктіреді.

«Бірлескен жұмыстың арқасында 3 миллиард теңгеден астам қаражатты ұрлауға жол берілмеді. Мыңдаған киберқылмыстың жолы кесілді, "қара тізім" жасалып, ІІМ осының негізінде мыңдаған іс қозғады. Бұл – дұрыс бағыт және біз бұл жұмысты жалғастырамыз», – деді Ұлттық банк төрағасы.

Ұлттық банк пен Қаржы нарығын реттеу және дамыту агенттігі алдағы бес жылға арналған қаржы реттеушілерін цифрландыру стратегиясын бекітті. Құжат екі органның барлық цифрлық бастамаларын біріктіріп, Қазақстандағы цифрлық қаржы экожүйесінің одан әрі дамуына негіз болмақ.

Қорыта айтқанда, Қазақстанда цифрлық қаржы жүйесі жылдам қарқынмен дамып, онлайн төлемдер экономиканың негізгі бөлігіне айналып отыр.