Толық емделетін ауру : Атырауда туберкулезге қатысты жағдай туралы баяндалды

Атырау облысында туберкулезге шалдығу деңгейі айтарлықтай төмендеді. Өткен жылы көрсеткіш 17,5 пайызға азайған.

Бұл туралы облыстық фтизиопульмонология орталығының директоры Байтолла Ғазизов брифингте мәлімдеді. Оның айтуынша, өткен жылы 262 жаңа жағдай тіркелген. Ұзақ мерзімді перспективада көрсеткіш одан да айқын: соңғы 10 жылда облыстағы сырқаттанушылық 1,8 есеге қысқарған.

Заманауи диагностика 

Ғазизовтың сөзінше, табыстың сыры ерте анықтауда жатыр. Қазір өңірде әлемдік стандарттарға сай зертханалық әдістер қолданылады. «Заманауи технологиялардың арқасында біз ауруды дер кезінде анықтай аламыз. Маңыздысы — дұрыс тәсіл қолданылса, туберкулез бүгінгі күні толық емделетін дерт», — деді ол.

Емдеу және әлеуметтік қолдау 

Мамандардың айтуынша, бүгінде барлық науқастарды ауруханаға жатқызбайды. Бактерия бөлмейтін және айналаға қауіп төндірмейтіндер емді тұрғылықты жеріндегі емханаларда амбулаториялық жағдайда қабылдайды.

Медициналық көмектен бөлек, мемлекет тарапынан қаржылай қолдау да көрсетіледі. Өткен жылы 702 тұрғын әлеуметтік төлем алған. Бұл мақсатқа жергілікті бюджеттен 214 млн теңгеден астам қаржы бөлінген.

Дәрігерлер халықты денсаулықты бақылаудың ең қарапайым әрі тиімді тәсілі — флюорографиядан уақытылы өтуге шақырады.

Бүгін, 18:40