Тоқаевқа Қарағанды облысының дамуы туралы баяндалды

Қарағанды облысына жұмыс сапары барысында Қасым-Жомарт Тоқаевқа өңірдің әлеуметтік-экономикалық дамуы жөнінде мәлімет берілді, деп хабарлайды Tengrinews.kz Ақордаға сілтеме жасап.

Мемлекет басшысына Қарағанды облысының негізгі әлеуметтік-экономикалық даму көрсеткіштері, инвестициялық жобалардың жүзеге асырылуы және өңірді одан әрі жаңғырту жоспары туралы ақпарат ұсынылды.

Тоғыз айдың қорытындысы бойынша облыс экономикасы 2,9 пайызға артып, өнеркәсіп өндірісі 4,9 пайызға ұлғайды. Айтарлықтай қарқын машина жасау саласында байқалды, өсім – 26,2 пайыз. Өңірдің 2032 жылға дейінгі инвестициялық портфелі жалпы құны 7 триллион теңгені құрайтын 186 жобадан тұрады. Оны іске асыру 36 мың жұмыс орнын ашуға мүмкіндік береді.

Фото: Ақорда баспасөз қызметі

Жаңа өндіріс орындарын құруға, шикізатты қайта өңдеуге, минерал-шикізат базасын нығайтуға, сондай-ақ отандық және шетелдік инвесторларды тартуға ерекше назар аударылып отыр.

"Президентке агроөнеркәсіп кешені мен тұрғын үй құрылысын ілгерілету, әлеуметтік инфрақұрылымды жаңғырту жұмыстары жөнінде баяндалды. Соңғы үш жылда Қарағанды облысында ауылдарға арналған 92 денсаулық сақтау нысаны мен 13 мектеп салынып, білім беру мекемелерін жаңарту жұмыстары жалғасып жатыр. Спорт, мәдениет, энергетика және тұрғын үй-коммуналдық шаруашылығы бағыттарындағы жобалар қолға алынды", - деп атап өтті Ақорда баспасөз қызметі.

Фото: Ақорда баспасөз қызметі

"Таза Қазақстан" бағдарламасы аясында елді мекендер абаттандырылып, жаңа қоғамдық кеңістіктер мен экосаябақтар бой көтеруде.

Болжамға сәйкес, жыл қорытындысы бойынша облыс экономикасы 4 пайызға өседі. Өнеркәсіп әлеуетін кеңейту, инвестициялық жобаларды іске асыру және халықтың өмір сүру сапасын арттыру арқылы өңірді одан әрі өркендету жұмыстары жалғаса береді.

Айта кетейік, 2 қарашада Қасым-Жомарт Тоқаев жұмыс сапарымен Қарағанды облысына барды. Ол Теміртаудағы бірқатар өндірістік және әлеуметтік нысандарды аралады.

Тоқаев Теміртауда Qarmet-ке барды

Өңірге сапары барысында Президент Теміртауда қалпына келтірілген трамваймен жүріп өтті. "Qarmet" АҚ басшылығымен қысқаша әңгіме барысында Мемлекет басшысы металлургтер қаласында трамвай қозғалысын қайта жандандыру маңызды екенін атап өтті.

Бізді Google-дың негізгі дереккөздер тізіміне қосыңыз