Тоқаев алғашқы АЭС тың сәтті іске қосылуы кімдерге байланысты екенін айтты

АСТАНА, 12 қараша — Sputnik. Мемлекет басшысы Қасым-Жомарт Тоқаев алғашқы АЭС-тың сәтті іске қосылуы кімдерге байланысты екенін айтты, деп хабарлайды Sputnik Қазақстан тілшісі.

Қазақстан президенті Ресейде мемлекеттік сапармен жүр. Бүгін ол Путинмен бірге бейнебайланыс арқылы Оралда басталған XXI Өңіраралық форумға қатысты. Сол кезде Тоқаев алғашқы АЭС-тың құрылысына тоқталды."Қазақстан "Росатом" басқаратын халықаралық консорциумның қатысуымен алғашқы атом электр станциясының құрылысына кірісті. Технологиялық әрі ғылыми тұрғыдан күрделі бұл жобаны табысты жүзеге асыру жоғары санатты кәсіби мамандарға тікелей байланысты. АЭС құрылысына алты мыңға жуық жұмысшы және үш мыңнан астам орта буын маманы жұмылдырылады. Сонымен қатар бейінді мамандарға сұраныс жоғары болатыны сөзсіз", - деді Тоқаев.

Сондықтан атом саласындағы кадр әлеуетін күшейту Қазақстан үшін аса маңызды.

"Біз бұл мәселені шешуде ресейлік жоғары оқу орындарымен ынтымақтастыққа ерекше мән береміз. әл-Фараби атындағы ҚазҰУ жанынан "МИФИ" Ұлттық ядролық зерттеу университеті филиалының ашылуы – соның айқын дәлелі", - деп түйіндеді мемлекет басшысы.