Тоқаев АҚШ пен Иран қол жеткізген келісімді құптады

АСТАНА, 15 маусым – Sputnik. Қасым-Жомарт Тоқаев АҚШ пен Иран қол жеткізген келісімді құптайды, деп хабарлады Ақорда президенттің әлеуметтік желідегі жазбасына сілтеме жасап.

"Халықаралық ахуал күрделі қазіргі кезеңде аймақ және әлемдік қоғамдастық үшін мұндай келісімнің маңызы зор. Біз тараптардың саяси ерік-жігерін жоғары бағалаймыз. Бұл өзара сенімді қалпына келтіріп, екі жаққа да тиімді шешім қабылдауға мүмкіндік берді. Сын сәтте батыл әрекет етіп, стратегиялық көрегендік танытқан АҚШ президенті Дональд Трамптың көшбасшылығын ерекше атап өтеміз", - деп жазды мемлекет басшысы X парақшасында.

Сонымен қатар ол Иран Ислам республикасы жетекшілігінің конструктивті ұстанымын құптайтынын жеткізді.

"Қазақстан осы бейбіт келісімге қол қою Таяу Шығыста және одан тысқары жерлерде бейбітшілік пен тұрақтылықтың берік негізін қалайтынына сенім артады", - деді Тоқаев.

15 маусымға қараған түні АҚШ президенті Дональд Трамп Иранмен атысты тоқтату туралы мәлімдеме жасады. Ислам республикасы оның мәлімдемесін құптап, АҚШ-қа бірқатар талаптар қойды.