Трамп АҚШ қа кіруге тыйым салынған елдер тізімін кеңейтті

2025 жылғы 16 желтоқсанда АҚШ президенті Дональд Трамп бірқатар елдердің азаматтарына Америка Құрама Штаттарына кіруді шектейтін және бұл талаптарды қатаңдататын жарлыққа қол қойды. Бұл туралы Ақ үйдің баспасөз қызметі хабарлады.

Жаңа шешімге сәйкес, Буркина-Фасо, Мали, Нигер, Оңтүстік Судан, Сирия азаматтарына, сондай-ақ Палестина билігі берген жол жүру құжаттары бар тұлғаларға АҚШ-қа кіруге толық тыйым салынды. Сонымен қатар бұған дейін жартылай шектеу қолданылған Лаос пен Сьерра-Леоне азаматтары үшін де енді толық тыйым енгізілді.

Бұрыннан бері күшінде тұрған «жоғары қауіп» санатындағы 12 елдің азаматтарына арналған толық кіру тыйымы сақталып отыр. Бұл елдер қатарында: Ауғанстан, Мьянма, Чад, Конго Республикасы, Экваторлық Гвинея, Эритрея, Гаити, Иран, Ливия, Сомали, Судан және Йемен бар.

Сондай-ақ бастапқыда жоғары қауіп тобына енгізілген 7 елдің ішіндегі 4 елдің азаматтарына (Бурунди, Куба, Того және Венесуэла) қатысты жартылай шектеулер күшінде қалды.

Оған қоса, 15 жаңа елдің азаматтары үшін ішінара шектеулер мен лимиттер енгізілді. Олар: Ангола, Антигуа және Барбуда, Бенин, Кот-д’Ивуар, Доминика, Габон, Гамбия, Малави, Мавритания, Нигерия, Сенегал, Танзания, Тонга, Замбия және Зимбабве.

Сол жарлық аясында Түрікменстан азаматтарына берілетін иммиграциялық емес визаларға қойылған тыйым алынып тасталды. Алайда Түрікменстан азаматтарының иммигрант ретінде АҚШ-қа кіруіне қойылған шектеу әлі де сақталады. Ақ үй бұл шешімді Түрікменстанның АҚШ-пен «тиімді ынтымақтастығы» және «айтарлықтай ілгерілеу көрсетуімен» түсіндірді.

АҚШ билігінің мәлімдеуінше, «қара тізімге» енген елдердің барлығында азаматтарды тексеру, іріктеу және ақпарат алмасу жүйелерінде тұрақты әрі елеулі кемшіліктер бар, бұл АҚШ-тың ұлттық қауіпсіздігіне қатер төндіреді.

Бүгін, 13:51