Трамп Ресей мен Украинаның энергетикалық нысандар бойынша уағдаластығы туралы мәлімдеме жасады

АҚШ президенті Дональд Трамп Ресей мен Украина бір-бірінің энергетикалық нысандарына соққы жасамауға келіскенін мәлімдеді, деп хабарлайды Tengrinews.kz.

Бұл туралы ол дүйсенбіде Truth Social әлеуметтік желісіндегі парақшасында жазды.

"Украина Ресейдің энергетикалық нысандарына соққы бермеуге келісті. Ресей де солай істеуге уағдаласты! Әлемдегі дизель отыны бағасының өсуі Иранға емес, негізінен Ресей-Украина соғысына байланысты", - деп жазды ол.

Бұған дейін Америка көшбасшысы Украина президенті Владимир Зеленскийді Ресейдегі дизель инфрақұрылымы нысандарына соққы жасамауға шақырған болатын. Трамп бұл мәселені Зеленскиймен талқылағанын мәлімдеп, басқа да көптеген нысан бар екенін атап өтті. Оның айтуынша, Киевтің шабуылдары бүкіл әлемге зиян келтіріп жатыр. Жаһандық отын тапшылығы Таяу Шығыстағы жағдайға емес, "Ресей мен Украинада болып жатқан жайттарға байланысты", - деп атап өтті Ақ үй басшысы.

Ол бұл мәлімдемені өткен жұмада АҚШ-тағы дизель отынының орташа бағасы алғаш рет галлонына 6 доллардан асып, рекорд деңгейге жеткеннен кейін жасады.

Бұған дейін БАҚ Украинаның бірнеше ай бойы Ресейдің мұнай-газ саласына қашықтан соққы беріп жатқанын жазған еді. Бұл бүкіл ел бойынша отын жеткізуді нормалауға әкеліп соқты және Мәскеуді шілдеде дизель отыны экспортына тыйым салуға мәжбүр етті, бұл әлемдік нарықтағы онсыз да шектеулі жеткізілімдерді одан әрі азайтты. Сонымен қатар жаһандық отын дағдарысы Ормуз бұғазы арқылы мұнай тасымалының қысқаруына әкеп соққан Иранмен соғыс аясында өрши түсті.

Бізді Google-дың негізгі дереккөздер тізіміне қосыңыз