Сикорский Украинаның ЕО ға кіруі туралы мәлімдеме жасады

АСТАНА, 27 маусым – Sputnik. Украинаның Еуропалық Одаққа мүшелікке қабылдануы жөніндегі келіссөздердің басталуы олардың міндетті түрде аяқталатынын білдірмейді. Бұл туралы Польшаның сыртқы істер министрі Радослав Сикорский мәлімдеді, деп хабарлайды РИА Новости.

IBRiS зертханасы жүргізген соңғы әлеуметтік сауалнама нәтижелері бойынша, Польша тұрғындарының шамамен 60%-ы Украинаның Еуропалық Одаққа кіруіне қарсы.

"Бір нәрсені есте ұстаған жөн: келіссөздердің басталуы олардың аяқталатынын білдірмейді", – деді Сикорский TVN телеарнасының эфирінде.

Ол келіссөздердің тараулары "өте күрделі болатынын" және "екі тарапқа да тиімді шешімдер әзірлеу қажет екенін" атап өтті.

Сонымен қатар, ол Украинаның ЕО-ға кіру мәселесінде Польшаның вето қою құқығына ие екенін еске салды.

"Польша Еуропалық Одақтың мүшесі әрі вето құқығына ие мемлекет ретінде бұл мәселеде, әрине, артықшылық жағдайында тұр", – деді Польша сыртқы істер министрі.

Еуропалық дипломатияның басшысы Кая Каллас 15 ақпанда ЕО елдерінің Украинаға Одаққа қашан қабылданатыны туралы нақты күнді айтуға әлі дайын емес екенін мойындады. Сондай-ақ бірқатар Еуропа елі Киевтің ЕО-ға қосылуына қарсы.

Ресей президенті Владимир Путин бұған дейін Украина төңірегіндегі жағдай оның Еуропалық Одаққа кіру мәселесінен басталғанын, бұл мемлекеттік төңкеріске, Қырымдағы оқиғаларға және әскери іс-қимылдарға алып келгенін мәлімдеген болатын. Сонымен бірге, ол Украинаның Еуропалық Одаққа мүшелігіне Ресейдің қарсы емес екенін, алайда ЕО-ның әскери блокқа айналуына қарсы екенін атап өткен.