Украинаның Еуроодаққа 2027 жылға қарай кіруі мүмкін емес еурокомиссар

АСТАНА, 24 наурыз – Sputnik. Украинаның Еуропалық одаққа 2027 жылдың қаңтарына қарай кіруі мүмкін емес. Бұл туралы одақтың кеңею жөніндегі еурокомиссары Марта Кос мәлімеді.

"Осы бөлмеде отырған адамдардың барлығы бұны жақсы түсінеді деп ойлаймын. Украинаның Еуропалық одаққа 2027 жылдың қаңтарына қарай кіруі мүмкін емес", - деді Кос Politico басылымы ұйымдастырған шарада.

Айта кетері, бұған дейін Еуроодақ Украинаға мүшелік құқығын біртіндеп беру сценарийін дайындап жатқаны хабарланды. Бұл сценарийге Германия мен Венгрия қарсы болды. Дегенмен Еуроодақ бұл сценарий тек Украинаға ғана қатысты ма, әлде он жылдан астам уақыт бойы өз кезегін күтіп отырған басқа кандидат елдерге де қолданылады ма, оны нақтылай алмайды.

Сонымен қатар, Еуропалық комиссия Украинаның Еуроодаққа мүшелігі үшін қажетті реформалардың қарқыны соңғы айларда тоқтап қалғанын, ал сыбайлас жемқорлыққа қарсы күрес, заң үстемдігі, БАҚ бостандығы және демократиялық институттар "сөзсіз талап етілетін критерийлерге сәйкес келуі керек" екенін мойындайды.