Тропикалық өсімдіктер жайқалған бақ

Ақтаулық фермер өз саябағында банан, мандарин, апельсин өсіріп отыр. Бамбукті де жерсіндірген. Қала іргесіндегі шағын бақ оқушылар мен туристерге агротуризм жобасы ретінде танымал. Өңірге саяхаттап келушілерден бөлек жергілікті тұрғындар да шөлейтті жерде өспейтін жасыл желектің түр-түрімен танысып, оларды егу тәсілдерін үйреніп жатыр.  

Талғат Исламұлы, тілші:

- Бұл жерде бұрын қоқыс полигоны болған. Фермер аумағы 3 гектар жерді 10 жыл бойы өңдеп, баққа айналдырды. Қазір мұнда алыс және жақын шетелден әкелінген 30-дан астам өсімдік түрі жайқалып тұр.

Мәуелеген бақ, тауыс пен тотықұстың үні, бамбук ағаштарына байланған гамак. Саябаққа кірген адам құдды бір тропикалық арал немесе елге барғандай әсерде қалады. Алып жылыжай кешені Приморский елдімекенінде орналасқан. Мұнда жыл сайын жүздеген турист келеді. Алуан түрлі гүл мен цитрус жемістерін ыдыста өсіру жолымен танысады.

Станислав Ли саналы ғұмырын фермерлік салаға арнаған. Бастапқы кезде ландшафты дизаймен айналысса, соңғы жылдары агротуризм жобасын қолға алған. Саябақтағы әр өсімдікті күнұзақ күтіп-баптайды. Тропикалық өсімдік дәндерін Иран мен Түркиядан әкелген. Өңірде баламасы жоқ саябақта мыңға жуық жасыл желек жайқалып тұр.

Станислав Ли, фермер:

- Бұл жобаны жастардың фермерлік салаға қызығушылығын ояту үшін қолға алдым. Бастапқыда қияр-қызанақ ектім. Жылдар өте келе тропикалық өсімдіктерді өсіре бастадым. Агробизнес дегеніміз осы емес пе. Баптап, күте білсеңіз барлық түрін егуге болады.

Фермер жылыжайға өз күшімен жылыту жүйесін орнатқан. Ауа баптағыш құралдары бақ ішіндегі қалыпты температураны ұстап тұрады. Жас көшеттер  арнайы биоқоспа аралас топырақтағы ыдыста өсіп жетіледі. Сабағы шыққан соң саябақ аумағына егіледі. 

Тазагүл Сархатова, бағбан:

- Маңғыстауға өспейді дегенге өз басым сенбеймін. Озеленениеде жұмыс жасап жатқаныма 21 жыл болды. 11 жыл қалағы көгалдандыруда жұмыс жасадым өзім. Содан көріп келе жатырмын. Мәселен, банандарды әкелді. Көп адам айтты өспейді мынау деп. Осы қаланың талай жеріне барып, өзімнің қолымен егіп те бердім. Шығып тұр бәрі.

Раиса Маденова, қала тұрғыны:

- Ақтауда мұндай бақты алғаш рет көрдім. Апельсин, мандарин, зәйтүн ағаштарын көріп таң қалдық. Еңбекқор адам қолға алса, бітпейтін шаруа жоқ. Өңірде осындай ерекше жобалар көп болсын. 

Саябақта Қазақстанда кездеспейтін аң-құстың бірнеше түрі бағылады. Фермер осы жерде шағын кинозал жасап, оқушыларға биология пәнінен танымдық сабақ өткізуді мақсат еткен. Мультфильм, деректі фильмдерді көрсету арқылы жас буынды қоршаған ортаны аялауға үндегісі келеді. 

Авторлары: Талғат Исламұлы, Саламат Бекбаев