TШO ның бұрынғы қызметкерлері миллиондаған долларлық тендерлерде заңсыздықтар болғанын мәлімдеді

Теңіз кен орнын игеретін ТШО компаниясында сатып алу саласында заңбұзушылықтар туралы хабарланды: бұрынғы қызметкерлер менеджерлерді тендерлерді өз мүдделеріне қарай бұрмалады деп айыптады.

Америкалық Chevron корпорациясы басқаратын Теңізшевройл компаниясының бұрынғы қызметкерлері жабдықтау бөлімінде сатып алу саласындағы жүйелі заңбұзушылықтар мен сыбайлас жемқорлық схемалары жөнінде айтты. Бұл туралы Newsbreak басылымы хабарлайды.

Ақпарат көздеріне сүйенсек, соңғы екі жыл ішінде ТШО-ның келісімшарттар департаментінде тендерлерді бұрмалау, фаворитизм және басшылық тарапынан қызметкерлерге қысым көрсету жағдайлары болған. Айыптаудың негізгі нысанында – стратегиялық сатып алу орталық тобының басшысы Джон Ригби. Ол қазақстандық кәсіпкер Ибрагим Акдрашев пен оның Karat LLP және NSS Group компанияларының мүддесін лобби жасады деп көрсетілген.

Ақпарат көздері атап өткендей, ТШО қызметкерлерінің тұруын қамтамасыз етуге арналған RFX6134801 тендері негізгі мысалдардың бірі болып табылады. Karat LLP техникалық талаптарға сай келмегеніне және қатысушылар арасында үшінші орында тұрғанына қарамастан, дәл осы компанияға артықшылық берілген деп хабарланады.

Ақпарат көздеріне сүйенсек, Ригби техникалық бағалау деректерін өзгертуге тапсырма берген, сол арқылы Акдрашевтің компаниясы коммерциялық кезеңге өтуіне мүмкіндік алған. Кейін оған 1,38 миллиард теңге шамасында (шамамен 2,6 миллион доллар) «мобилизациялық шығындарға» алдын ала төлем жасалған. Бұрынғы қызметкерлердің айтуынша, сол соманың 1 миллион доллары Ригбиге «көмегі үшін алғыс» ретінде берілмек болған, және ол ақша Қазақстаннан тысқары аударылуы тиіс болған.

Егер бұл ақпарат расталса, онда бұл АҚШ-тың шетелдегі сыбайлас жемқорлыққа қарсы (FCPA) заңы бойынша тергеу жүргізуге негіз бола алады. Бұл заң американдық компанияларға шетелдік лауазымды тұлғаларға немесе серіктестерге пара беруге тыйым салады.

Қорқыту, қысым көрсету және ізді жасыру 

Ақпарат көздерінің хабарлауынша, Акдрашев ТШО қызметкерлерімен болған әңгімелерді жазып алған және осы жазбаларды қысым жасау мен ақпараттың сыртқа таралуын болдырмау үшін пайдаланған. Бұл қызметтік тергеулердің жүргізілуіне кедергі жасап, қорқыныш атмосферасын туғызған.

Сондай-ақ, Ригби мен Акдрашев арасындағы қарым-қатынас шамамен он жылға созылған — Future Growth Project (FGP) жобасын жүзеге асыру кезеңінен бастау алатыны айтылады. Бұрынғы қызметкерлердің айтуынша, Ригби Акдрашевтің бизнесін бірнеше тендерде қолдап, есесіне шетелге БАӘ, Еуропа, Түркия және Тайландқа демалыс сапарлары түрінде марапат алып отырған.

АҚШ билігіне жолданған шағым

2025 жылғы ақпан айында бұрынғы қызметкерлер тобы Chevron компаниясының шұғыл желісі арқылы «Karat LLP мердігерінің заңсыз әрекеттері мен ТШО-ға қысым көрсетіліп жатқаны» туралы шағым жолдаған. Аталған құжаттар ұсынылса да, олардың айтуынша, жауап алынбаған.

Қазіргі уақытта ақпарат көздері АҚШ Әділет министрлігі мен Құнды қағаздар және биржа комиссиясын (SEC) өз тергеуін бастауға және Ригби мен Акдрашевке қатысты полиграф арқылы тексеру жүргізуге шақырып отыр.

Анықтама:

Ибрагим Акдрашев – Forbes.kz дерегінше, $184 млн капиталымен Қазақстанның ең бай 75 бизнесменінің қатарына енген. Ол «Нефтестройсервис ЛТД» ЖШС-нің иесі. Компания тобына «CIS Kashagan», «КазахНефтеГазСервис», «Kentz Kazakhstan» және «Батысстройконтракт Лтд» ЖШС-лары кіреді. 

2012 жылы Атырау облысының «Жыл кәсіпкері» атанған. 

Ал Джон Ригби жақында Атырау қаласындағы Қарттар үйінде «Теңіз Жүрегі» жобасы аясында қарттарға қазақ тілінде «Қалайсын» және «Бұл өмірде» атты әндерді орындаған еді.

Bu gönderiyi Instagram'da gör

НОВОСТИ АТЫРАУСКОЙ ОБЛАСТИ (@atyrau_today_news)'in paylaştığı bir gönderi

Бүгін, 17:46