Мадагаскар президенті билікті әскерилер басып алмақ болғанын мәлімдеді

CAPSAT (әскери кадр және әкімшілік-техникалық қызметтер корпусы) деген атаумен белгілі армия бөлімшесі әскери қолбасшылықты өз қолына алғанын, енді ол құрлықтық, әуе және әскери-теңіз сияқты барлық әскери құрылымдарды басқаратынын мәлімдеген.

Ең қызығы, тап осы бөлімше Мадагаскарда 2009 жылы болған саяси дағдарыс кезінде шешуші рөл атқарып, Радзуэлинаның билік басына келуіне негіз болған.

Мадагаскарда алғашқы наразылық акциялары 25 қыркүйекте басталды. Бастапқыда тұрғындар су мен электр энергиясының өшірілуіне қарсы шыққанымен, кейін бұл қозғалыс жұмыссыздықтың жоғары деңгейі, сыбайлас жемқорлық және өмір сүру құнының өсуіне байланысты үкіметке қарсы кең ауқымды наразылыққа ұласты.

Сенбі күні ел астанасы Антананаривудің шетінде орналасқан әскери бөлімдердің кейбір сарбаздары казармаларын тастап, қала әкімдігі алдында жиналған демонстранттарға қосылды.

Мадагаскар Қарулы күштерінің арнайы парашюттік бөлімшесі – CAPSAT – соңғы күндері Антананаривудағы наразылықтарды тарату кезінде қауіпсіздік күштерінің күш қолдануын айыптады.

Президент әкімшілігі сенбі күні таратқан мәлімдемесінде мемлекет басшысы Андри Радзуэлина мен өткен аптада тағайындалған жаңа премьер-министр, армия генералы Руфин Зафисамбо елдегі жағдайды толық бақылауда ұстап отырғанын хабарлады.

Осыған дейін Мадагаскар президенті үкіметті тарату туралы шешімін жариялағаны туралы жаздық.