Тұрғын үй саудасы 47,8 пайызға азайды

АСТАНА, 11 ақпан – Sputnik. Қазақстанда қаңтарда тұрғын үйді алып-сату мәмілелерінің саны 47,8% азайды, деп хабарлайды Ұлттық статистика бюросы.

2026 жылғы қаңтар айында тұрғын үйді алып-сату бойынша 27 745 мәміле тіркелген, оның ішінде жеке үйлер бойынша 6 020 және көппәтерлі үйлердегі пәтерлер бойынша 21 725 мәміле жасалды.

"2025 жылдың желтоқсанымен салыстырғанда (53 128) тұрғын үйді алып-сату саны 47,8% азайды. Мәмілелер саны бойынша Астана (5 375 – 19,4%), Алматы (5 191 – 18,7%) қалалары, сонымен қатар Қарағанды облысы (2 241 – 8,1%) көш бастап тұр. Мәмілелер саны Ұлытау облысында ең аз – 283 мәміле (1,0%) тіркелген", - деп жазылған хабарламада.

2025 жылдың желтоқсанымен салыстырғанда 2026 жылдың қаңтарында мәмілелер санының азаюы барлық өңірде тіркелген. Ең қатты төмендеу Павлодар (-68,1%), Абай (-64,0%) және Солтүстік Қазақстан (-57,3%) облыстарында тіркелді.

Көппәтерлі үйлердегі тұрғын үй мәмілелерінің саны 47,2% (19 452 мәмілеге) азайды. 2026 жылдың қаңтарында пәтерлер бойынша барлығы 21 725 мәміле жасалды, бұл мәмілелердің жалпы санының 78,3%. Көппәтерлі үйлердегі тұрғын үй саудасының негізгі үлесі Астана (24,3%), Алматы (21,9%) қалаларына және Қарағанды облысына (8,8%) тиесілі. Бөлмелер саны бойынша 1 бөлмелі пәтерлер сатылымы басым болды, олар бойынша 8 247 мәміле ресімделген.

"Жеке тұрғын үйлер бойынша мәмілелер саны 49,6% (5 931 мәмілеге) азайды. Қаңтарда барлығы 6 020 мәміле тіркелген. Жеке тұрғын үйлер бойынша мәмілелер санының төмендеуі еліміздің барлық өңірінде тіркелген", - делінген хабарламада.

Жеке тұрғын үйлер бойынша мәмілелер санының ең қатты төмендеуі Абай (-65,7%), Ақтөбе (-63,8%) және Батыс Қазақстан (-60,6%) облыстарында байқалды.

2026 жылғы қаңтарда тұрғын үйді алып-сату мәмілелері алдыңғы жылдың тиісті айымен салыстырғанда 10,3% азайған, ол кезде 30 917 мәміле ресімделген болатын. Жылдық мәнде мәмілелер санының ең жоғарғы өсімі Шымкент қаласында (+32,2%) байқалды, ең қатты төмендеу – Батыс Қазақстан облысында (-32,4%).