Түркі әлемінің жасанды интеллект этикасына арналған алғашқы жиыны өтті

Іс-шараға Әзербайжан, Қазақстан, Қырғызстан, Түркия, Өзбекстан, Пәкістан, Румыния және Тайландтан келген ғылыми және халықаралық ұйымдардың өкілдері қатысқан. Олар білім беру, мәдениет және қоғам өміріндегі жасанды интеллектінің рөлін, білім трансформациясы, этика, цифрлық тәуелсіздік және еңбектің болашағы сияқты өзекті тақырыптарды қозғады. Сонымен бірге, технологияларды жауапты және этикалық тұрғыда дамыту үшін халықаралық ынтымақтастықтың маңыздылығына назар аударылды.

Өз сөзінде Түркі академиясының президенті Шаһин Мұстафаев адамгершілік құндылықтар мен моральдық ұстанымдарға сүйенбей технологиялық ілгерілеу жүзеге аспайтынын атап өтті.

– Жасанды интеллект адамзатқа бұрын-соңды болмаған мүмкіндіктер ашып қана қоймай, жаңа этикалық сын-қатерлерді де тудырады. Философиялық және гуманистік дәстүрі терең түркі әлемі әділ әрі жауапты цифрлық дәуірді қалыптастыруға өз үлесін қосуы қажет және білім мен этика әрдайым қатар өрбуі тиіс, – деді ол.

Конференцияда Баку мемлекеттік университеті жанынан құрылған, заманауи зерттеулер жүргізуге және техникалық құзыретті гуманистік көзқараспен ұштастыра білетін жаңа буын мамандарын даярлауға бағытталған Жасанды интеллект этикасына арналған жаңа кафедра таныстырылды.

Бұған дейін Түркияда Түркі дүниесі археологтары қауымдастығының екінші отырысы өткен еді.