Түркістан облысында астық тиелген вагондар қаңтарылып тұр

Орталық Азия елдеріне жөнелтілуі тиіс ауыл шаруашылығы өнімдерінің экспорты кестеден кешікті.

Теміржол бойындағы станцияларда 5 мыңнан астам астық тиелген вагон қаңтарылып тұр. Кейбірі 6 тәулікке дейін кезекке қойылған. Осыған байланысты қауіпсіздік шаралары күшейтіліп, қосымша күзет қызметі жұмылдырылды.

Ғабит Сүйінов, Дарбаза стансасының бастығы:

- Біздің Дарбаза станциясында тұру мүмкін емес өтіп кету керек негізі. Сарыағаш станциясы қабылдамауына байланысты бізге тастап тұрады пойыздардың бәрін. Сол себепті 250 вагон бізде тұр қазіргі таңда. Бөлек охрана жалдайды. Өзіміз күзет жасаймыз. Вагондарға қараймыз. Оның ішінде транзиттік груздар бар. 

Теміржолшылардың айтуынша, жалпы 11 мыңнан астам вагонның қозғалыс кестесі бұзылған. Оған Өзбекстан тарапынан жүк пойыздарын қабылдау мүмкіндігінің шектелуі себеп. Талдау қорытындысынан кейін көрші елмен келіссөздер жүргізіліп, жағдайды реттеу шаралары қолға алынды. Оның үстіне биыл астық экспорты өткен жылмен салыстырғанда едәуір артып, 4,5 миллион тоннаға жетіп отыр.

Нұрдәулет Байғазиев, ҚТЖ Шымкент жүк тасымалы бөлімшесінің директоры:

- Өзбекстан темір жолына қазіргі таңда көмек көрсетіп жатырмыз. Бізден алған пойыздарды тез өңдеп, тез түсіріп шығару үшін адресный пойыздарды назначениемен туралап беріп жатырмыз. Локомотив жетіспеу мәселесі бойынша келісім шартқа тұрды. Біз бүгінгі таңда Өзбекстан теміржолына 7 локомотив жалға бердік. 

Сарыағаш станциясында да бақылау жүйесі жетілдіріліп жатыр. Алдын ала ақпарат алмасудың арқасында кедендік декларациялау уақыты 6 сағаттан 3 сағатқа дейін қысқарды. Бұл транзиттік тасымал мерзімін сақтауға мүмкіндік береді, дейді мамандар. 

- Бас-аяғы құжатты тексеруге шамамен 2 секунд уақыт кетеді. Тәулігіне 1500-1550 құжат. Қазіргі вагондардың бәрі жеке вагондар. Олардың бәрі құжаттарымен жүреді. 

Жүктемені азайту үшін кешенді жоспар бойынша жұмыс атқару қажет. Себебі теміржол тасымалындағы кедергілер жыл сайын қайталана береді. Осыған байланысты Орталық Азия елдеріне шығатын балама бағыт қарастырылды. 

Нұрсұлтан Мұхамеджан, тілші:

- Сала мамандарының айтуынша, инфрақұрылымды жақсартпайынша транзиттік тасымалдағы түйіткілді шешу қиын. Қазір мұнда Мемлекет басшысының тапсырмасымен жаңа теміржол желісі салынып жатыр. Құрылысы аяқталса Сарыағаш стансасының жүктемесін 40% жеңілдетуге мүмкіндік туады.

Парламент Мәжілісінің депутаттары теміржол саласын толық цифрландыру қажет деп санайды. Өйткені жүк айналымын жеделдетіп, логистикалық үдерістерді оңтайландыру заман талабы. Ал бұл тасымалдағы қауіпсіздік пен ашықтықты қамтамасыз етеді.

Юлия Кучинская, ҚР Парламенті Мәжілісінің депутаты:

- Жүк тасымалына нақты, тұрақты ережелерді енгізу қажет деп санаймыз. Ашықтықты қамтамасыз етіп, тараптардың жауапкершілігін теңестірген жөн. Оператордың қателіктерін бизнес өкілдеріне ысыруға жол берілмеуі керек. Сондай-ақ саланы цифрландыру, инфрақұрылым, шекаралық бақылауды үйлестіру қажет. Ол үшін жүктемені болжауға, бақылауға арналған цифрлық құралдарды енгізуді ұсынамыз. 

«Қазақстан темір жолы» компаниясының мәліметінше, логистиканы жетілдіру мақсатында ауқымды жұмыс жүріп жатыр. Басты мақсат жүк тасымалын тұрақтандыруға бағытталған. Мамандардың айтуынша, алдағы күндері өңірдегі ахуал қалыпты режимге көшеді.

Нұрсұлтан Мұхамеджан, Нұрмахан Мұсатов, Нұрмахан Бекмұратов