Қостанай облысында астық өнімділігі жылдағыдан жоғары

Қостанай облысында егін орағы аяқталуға жақын. Қазір дәнді дақылдар алқабының 99,3 пайызы жиналған.

Астық түсімі гектарынан 16 центнерден асып отыр. Бұл соңғы он жылдағы рекордтық көрсеткіш. 

Биыл облыста гектарынан 60 центнерден астық жинаған шаруашылықтар бар дегенде таңғалғанымыз рас. Себебі қолайлы деген жылдары күтім бабы келіскен алқаптардың өзінен әрі кетсе 40-45 центнер алынатын. Өңірде бұрын-соңды болмаған өнімділікке қол жеткізген шаруалардың бірі сарыкөлдік Мұрат Оразбеков.

Мұрат Оразбеков, шаруа:

- Жоғары өнім алуымызға бірнеше алғышарттар септігін тигізді. Былтыр сол алқапта дәнді жасымық ектік. Ол топырақты азотпен байытады. Күзде жерді тыңғылықты өңдедік. Сосын тұқым таңдауға аса мән бердік. Ылғалдан да кенде болғанымыз жоқ. Бірақ соның ішінде ең маңыздысы - кәсіби мамандардан тұратын ұжым еңбегінің жемісі деп білемін.

Астық түсімі жағынан облыста Сарыкөл ауданы көш бастап тұр. Мұнда орташа есеппен гектарынан 22 центнерден өнім жиналды. Ал Мұрат Оразбеков сияқты егіншіліктің озық технологиясын қолданғандардың несібесі тіптен еселеп қайтты. Алайда бәрі мінсіз болды деп тағы айта алмаймыз.

Талғат Мұқанов, Сарыкөл аудандық ауыл шаруашылығы бөлімінің басшысы:

- Егін орағы басталғанда бидай ылғалдылығы 13-14 пайыз болатын. Тамыз, қыркүйекте жиі жаңбыр жауып, ылғалдылық 16-18, кей жерлерде 20 пайызға дейін көтеріліп кетті. Аудан аумағында 3 элеватор, 30 кептіргіш кешені бар. Қазір солар үздіксіз жұмыс істеп тұр.

Жауын-шашын бидай сапасына да кері әсер етпей қойған жоқ. Жиналған астықтың жартысы 3-сұрыпқа жатқызылған. Ауа райы науқан барысына біраз қолбайлау жасады. 

Кенже Жұмандықов, Ауыл шаруашылығы басқармасының бас маманы:

- Шілде айы мен тамыз айының басында жаңбыр болып, содан біздің вегетациялар созылып кеткеннен кейін егін жинау науқаны созылып кетті. Қалғаны бүгін-ертеңдері бітіреді.

Жалпы биыл Қостанай облысы 6 млн 600 мың тонна астықты қамбаға құйды. Бұл былтырғы көлемнен біршама көп.

Авторлары: Мағауия Қалиев, Сергей Трахтенберг