Түркістан облысында бес баланың әкесін жауыздықпен өлтірген

АЛМАТЫ, 1 тамыз – Sputnik. Түркістан облысы Түлкібас ауданында бес баланың әкесін пышақтап өлтірді, деп хабарлайды Sputnik Қазақстан.

Бұл туралы ақпарат әлеуметтік желіде тарады. 32 жастағы жігітті көшеде пышақтап, қансыратып тастап кеткен. Желіде тараған ақпаратта Түлкібас ауданында бес баланың әкесіне ауылдастары жабылып, оны жауыздықпен өлтіргені айтылған. Қаралы хабарды естіп, алып-ұшып ауруханаға жеткен жұбайы жолдасының алған жарақатын көріп төбе шашы тік тұрған екен.

"Сіздің күйеуіңіз бе? Көріңіз" деп бетіндегі матаны ашқанда, кеңірдектен қан атқылап жатты. Кеңірдектің үстіңгі жағына да пышақ сұғылған. Денесінің сау жері жоқ. Басының бәрін жарып тастаған. Саусақтарының бәрі сынып ісіп көгеріп кеткен. Қолының екі жеріне пышақпен жарақат салған", - дейді марқұм жігіттің әйелі.

32 жастағы азаматтың өлім алдындағы сәті көше бойындағы бейнекамераға түсіп қалған. Жазбада жігітті ауылдастары жол ортасында жерге жатқызып қинағаны байқалады. Қаншама рет қашып құтылуға ұмтылғанымен, бір топ адам азаптауын тоқтатпапты. Қара жамылған отбасы күдіктілердің бостандықта тайраңдап жүргеніне қапалы. Марқұмның анасы Пакизат Алтынбекованың айтуынша, күдіктілер бостандықта жүр.

"Менің балам жер қойнауында, қара жерде жатыр. Қалғандарының барлығы үйлерінде тамақ ішіп, ойнап-күліп жүр. Бес баласы қалды артында. Қырқынан шықпаған баласы бар. Бір баланы Шымкентке СИЗО-ға әкетті дейді. Тапсырыспен жасалған өлім. Тапсырыс берген баланы босатып жіберген. Ол үйінде тамақ ішіп, жылы төсекте жатыр", - дейді марқұмның анасы.

Түркістан облысының полициясы қылмыстық іс қозғалды дейді.

"Полиция оқиғаның барлық қатысушысын анықтады, күдіктілер ұсталды. Тергеу қорытындысы бойынша барлық қатысушылардың іс-әрекеттеріне құқықтық баға беріліп, іс жүргізу шешімі қабылданатын болады", - дейді полиция.

Қазір тергеу жүргізіліп жатыр.